“Novocaine” (2025) මේක පට්ට ඇක්ෂන් කොමඩි එකක්. බලපු නැති කෙනෙක්ට වුණත්, කතාව ඇහුවම බලන්න හිතෙනවා.

මේක අධ්‍යක්ෂණය කරලා තියෙන්නෙ Dan Berk සහ Robert Olsen කියන අධ්‍යක්ෂකවරු දෙන්නා. ප්‍රධාන චරිත දෙක වන නේතන් සහ ෂෙරී විදිහට රඟපාන්නෙ Jack Quaid සහ Amber Midthunder.

ප්‍රධාන චරිතය තමයි නේතන්. මෙයා හරිම සාමාන්‍ය විදිහට ජීවත් වෙන, බෑන්ක් එකක වැඩ කරන කෙනෙක්. හැබැයි මෙයාට උපතින්ම එන, හරිම දුර්ලභ වෛද්‍ය තත්ත්වයක් තියෙනවා. ඒ තමයි, එයාට ශාරීරික වේදනාව කොහෙත්ම දැනෙන්නෙ නෑ. කවුරුහරි ගැහුවත්, පිහියකින් කැපුවත් එයාට කිසිම ගාණක් නෑ.

මේ නිසා එයා ජීවත් වෙන්නෙත් හරිම පරිස්සමෙන්. මොකද, ඇඟට ලොකු හානියක් වුණත් එයාට ඒක නොදැනී යන්න පුළුවන් නිසා.

මෙයා වැඩ කරන බෑන්ක් එකේම ඉන්න ෂෙරී කියන තරුණියත් එක්ක මෙයාගෙ හිත යනවා. දෙන්නා ටික ටික ලං වෙද්දිම, කවුරුත් හිතපු නැති දෙයක් වෙනවා. දවසක් දරුණු හොරු කල්ලියක් බෑන්ක් එකට පැනලා, ලොකු කොල්ලයක් කරනවා. ඒ මදිවට, එයාලා ෂෙරීවත් පැහැරගෙන යනවා.

දැන් තමයි නේතන්ගෙ ගේම පටන් ගන්නෙ. තමන්ගෙ පෙම්වතියව බේරගන්න, මෙච්චර කල් ‘අවාසියක්’ විදිහට තිබ්බ මේ වේදනාව නොදැනෙන එකම, එයා තමන්ගෙ ‘සුපිරි බලය’ විදිහට පාවිච්චි කරනවා.

හැබැයි වේදනාව දැනුණෙ නැති වුණාට, ඇඟ කෑලි කැඩිලා බිඳිලා යද්දිත් එයාට දිගටම සටන් කරන්න වෙනවා. නේතන් දරුණු විදිහට තුවාල වෙවී, ඒ හොරු පස්සෙ පන්නනවා. එයාට ෂෙරීව බේරගන්න පුළුවන් වෙයිද කියන එක තමයි කතාව.