නළු නිළියන් සහ අධ්‍යක්ෂණය: මෙම චිත්‍රපටය අධ්‍යක්ෂණය කරන්නේ ප්‍රවීණ නළු George Clooney විසිනි. ඔහුම ප්‍රධාන චරිතය වන Augustine ලෙස රඟපාන අතර, Felicity Jones (Sully) සහ Caoilinn Springall (Iris) ද ඊට එක්වේ.

මේක නම් ඔයාලගේ හිතට ගොඩක් දැනෙන, ඒ වගේම ටිකක් වෙනස් විදිහේ Sci-Fi කතාවක්. කතාව වෙන්නේ 2049 වගේ කාලෙක. මොකක් හරි ලොකු විකිරණ අනතුරක් නිසා මුළු පෘථිවියම විනාශ වෙලා, මිනිස්සුන්ට ජීවත් වෙන්න බැරි තත්ත්වයක් උදා වෙලා තියෙන්නේ. මිනිස්සු පුළුවන් තරම් පොළොව යට බංකර්වලට වෙලා ආරක්ෂා වෙනවා. හැබැයි ඔගස්ටින් කියන වයසක විද්‍යාඥයා විතරක් ආක්ටික් (උත්තර ධ්‍රැවය) පර්යේෂණාගාරයක තනි වෙනවා. එයාට දරුණු ලෙඩක් තියෙන නිසා එයා තීරණය කරනවා අනිත් අය වගේ පැනලා යන්නේ නැතුව එතනම නවතින්න.

ඔගස්ටින් මෙතන තනි වෙලා ඉන්නේ නිකන්ම නෙවෙයි, එයාට ලොකු රාජකාරියක් තියෙනවා. “ඊතර්” (Aether) කියලා අභ්‍යවකාශ යානයක් බ්‍රහස්පති ග්‍රහයාගේ ඉඳන් ආපහු පෘථිවියට එමින් තියෙනවා. ඒ යානයේ ඉන්න කවුරුත් දන්නේ නෑ පෘථිවිය විනාශ වෙලා කියලා. ඔගස්ටින් උත්සාහ කරන්නේ කොහොම හරි රේඩියෝ සිග්නල් හරහා එයාලට කතා කරලා “පෘථිවියට එන්න එපා, ආපහු හැරිලා යන්න” කියලා කියන්න. මේ අතරේ තමයි ඔගස්ටින් දකින්නේ එයා ඉන්න තැන පුංචි ගැහැණු ළමයෙක් හැංගිලා ඉන්නවා. මේ පොඩි ළමයා කතා කරන්නේ නෑ.

දැන් ඔගස්ටින්ට ප්‍රශ්න දෙකක්. එකක් මේ පොඩි ළමයව මේ හිම කතරේ ආරක්ෂා කරගන්න ඕන. අනිත් එක අර අභ්‍යවකාශ යානයට පණිවිඩේ යවන්න ඕන. හැබැයි එයා ඉන්න තැන ඇන්ටනා එක වැඩ නෑ. ඊට වඩා බලගතු ඇන්ටනා එකක් තියෙන තැනකට යන්න එයාට මේ හිම කුණාටු අස්සේ කිලෝමීටර් ගාණක් යන්න වෙනවා. මැරෙන්න ඔන්න මෙන්න ඉන්න මනුස්සයෙක්, නොදන්නා පොඩි ළමයෙක් එක්ක කරන මේ බිහිසුණු ගමන තමයි කතාවේ හරය. අන්තිමට මේ පොඩි ළමයා කවුද? අභ්‍යවකාශ යානයට පණිවිඩේ ලැබෙයිද? අවසානය නම් ඔයාලා හිතනවාට වඩා ගොඩක් හැඟීම්බරයි.