ජැක් කාටර් කියන්නේ ලාස් වේගාස් වල ඉන්න මැර කල්ලියකගේ “එන්ෆෝසර්” කෙනෙක්. ඒ කියන්නේ, ණය කාරයෝ බය කරලා සල්ලි ගන්න, වැඩේ දරුණු විදියට කරන කෙනෙක්.
එයාට එක දවසක් ආරංචියක් එනවා, එයාගේ මල්ලිට බේබදු කම නිසා වෙච්චි කාර් අනතුරකින් මැරුණා කියලා.

මේක අහපු ගමන් ජැක්ට හිතෙනවා, “ඒක බොරුවක්” කියලා. මොකද එයාගේ මල්ලි එහෙම ලේසියෙන් බීලා වාහන එළවන්නේ නැති බව ජැක් දන්නවා.
ඉතින්, මල්ලිගේ අවමංගල්‍යට ජැක් එයාගේ ගමට, සීටල් වලට, යනවා. එයාට ඕනේ ඇත්තටම මොකද වුනේ කියලා හොයාගන්න.

නමුත් එයා එහෙට ගිය ගමන් තේරෙනවා, මේ කතාවට බැඳිච්චි අය මේ පළාතේ ඉන්න ලොකුම අපරාධ කාරයෝ, ලොකු ව්‍යාපාරිකයෝ වගේම අන්තර්ජාල අසභ්‍ය වීඩියෝ ලෝකේ ඉන්න තිමිංගලයොත් කියලා.

ජැක්ට දැන් තියෙන්නේ ප්‍රශ්න ගොඩක්. ඇත්තටම මල්ලිට මොකද වුනේ? මේ හැමෝගෙම සම්බන්ධය මොකක්ද?

තමන්ගේ මල්ලි වෙනුවෙන්, යුක්තිය වෙනුවෙන්, ජැක් කාටර් යන මේ භයානක ගමනේ අවසානය කොහොම වෙයිද? ඔහු මේ හැම දෙනාටම එරෙහිව නැගී සිටීවිද? ඒක දැනගන්න නම්, චිත්‍රපටිය බලන්නම වෙනවා!