මේකේ ප්‍රධාන චරිත දෙක තමයි සු-ජින් (Su-jin) සහ චුල්-සූ (Chul-soo). සු-ජින් කියන්නේ ටිකක් අමතක වෙන සුළු, හැබැයි හරිම හුරතල්, සල්ලි තියෙන පවුලක කෙල්ලෙක්. චුල්-සූ කියන්නේ ඉදිකිරීම් වැඩපොළක වැඩ කරන, ටිකක් රළු පරළු, හැබැයි හිත හොඳ කොල්ලෙක්.
මේ සම්පූර්ණයෙන්ම වෙනස් දෙන්නා අහම්බෙන් හම්බවෙලා, පොඩි පොඩි වලි දාගෙනම ආදරෙන් බැඳෙනවා. හැමෝගෙම විරුද්ධතා මැද එයාලා කසාද බැඳලා හරිම ලස්සන ජීවිතයක් පටන් ගන්නවා.

ඒත් මේ සතුට වැඩි කල් තියෙන්නේ නැහැ. සු-ජින්ට පොඩි පොඩි දේවල් අමතක වෙන්න පටන් ගන්නවා. මුලදී හැමෝම හිතන්නේ මේ එයාගේ හැටි කියලා. ඒත් ටික ටික මේ ‘අමතක වීම’ බරපතළ වෙනවා. තමන්ගේ ගෙදරට යන පාර, තමන් ආදරය කරන කෙනාගේ නම පවා එයාට අමතක වෙන්න ගන්නවා.

මේක සාමාන්‍ය අමතක වීමක් නෙවෙයි. ඒක දරුණු ලෙඩක ආරම්භයක්. සු-ජින්ගේ මතකය ටිකෙන් ටික, සම්පූර්ණයෙන්ම එයාගෙන් නැතිවෙලා යනවා.
චුල්-සූ මොනවා කරයිද? තමන්ගේ ආදරේ, තමන්ව අඳුරන්නෙවත් නැති තැනට පත්වුණාම, ඒ ආදරේ වෙනුවෙන් එයා කොච්චර දුරක් යයිද? ආදරේට පුළුවන්ද මතකය සම්පූර්ණයෙන්ම මැකිලා ගිය තැනක වුණත් ජීවත් වෙන්න? කතාව බලන්නම වෙන්නේ ඒ කුතුහලය නිසාමයි.