හිතන්නකො, ඔයා ප්ලේන් එකක යද්දී එකපාරටම හතරදෙනෙක් තුවක්කු අරන් ඒක හයිජැක් කරනවා. “7 Days in Entebbe” කියන්නෙ 1976 වෙච්ච ඒ වගේ ඇත්තම සිදුවීමක් ගැන.

කතාව පටන් ගන්නෙ Air France ප්ලේන් එකක් තෙල් අවීව් ඉඳන් පැරිස් යද්දී. හැබැයි පලස්තීන සහ ජර්මන් විප්ලවවාදීන් කණ්ඩායමක් මේක අල්ලගන්නවා. එයාලා ප්ලේන් එක හරවගෙන යන්නෙ කෙලින්ම උගන්ඩාවේ එන්ටෙබේ එයාර්පෝට් එකට. ඒ දවස්වල උගන්ඩාව පාලනය කරපු ඉඩි අමීනුත් මේකට යම්තාක් දුරකට සම්බන්දයි.

ත්‍රස්තවාදීන්ගෙ ඉල්ලීම සරලයි: ලෝකෙ පුරා හිරේ ඉන්න එයාලගෙ සගයො ටිකක් නිදහස් කරන්න ඕන. නැත්නම් මගීන්ව මරනවා. වැඩේ තවත් දරුණු වෙන්නෙ, එයාලා යුදෙව් සහ ඊශ්‍රායල් මගීන්ව අනිත් අයගෙන් වෙන් කරනකොට.

දැන් ඊශ්‍රායල් ආණ්ඩුව ඉන්නෙ ලොකු අමාරුවක. ත්‍රස්තවාදීන් එක්ක කතා කරනවද? ඒක එයාලගෙ ප්‍රතිපත්තිය නෙවෙයි. එහෙම නැත්නම් කිලෝමීටර් දහස් ගාණක් ඈත තියෙන එයාර්පෝට් එකකට රහස් කමාන්ඩෝ මෙහෙයුමක් දියත් කරනවද? ඒක මාරම රිස්ක් එකක්.

කාලය ටික ටික ඉවර වෙනවා. මගීන් ඉන්නෙ මරණ බයෙන්. ආණ්ඩුව ඇතුළෙ ලොකු වාදයක්. අර ජර්මන් ත්‍රස්තවාදීන් දෙන්නත් ඉන්නෙ තමන්ගෙ අතීතය මතක් වෙලා පොඩි අවුලක. මේ දවස් හතේ මොකක් වෙයිද? මගීන්ට ගැලවීමක් ලැබෙයිද? ෆිල්ම් එක ඉවර වෙනකල් හුස්ම තදකරගෙන බලන් ඉන්න වෙනවා.