අපි දන්න විදිහට ලෝකේ ඉවර වෙලා. අමුතුම දිලීරයක් (fungus) නිසා මිනිස්සු බහුතරයක් ‘හන්ග්‍රීස්’ (Hungries) කියලා භයානක, මිනී මස් කන ජීවීන් බවට පත් වෙලා.

මේ ඔක්කොම මැද්දේ, තදබල හමුදා ආරක්‍ෂාවක් යටතේ තියෙන කඳවුරක, විශේෂ ළමයි වගයක් හිර කරගෙන ඉන්නවා. මේ ළමයි හරිම අමුතුයි. උනුත් අර ‘හන්ග්‍රීස්’ ලා වගේ තමයි. ඒ කියන්නේ උන්ටත් මනුස්ස ගඳ ආවම පාලනය කරගන්න බැරි තරම් බඩගින්නක් එනවා.

ඒත්, ඒ ගොල්ලෝ සාමාන්‍ය ‘හන්ග්‍රීස්’ ලා වගේ නෙවෙයි. උන් මනුස්සයෝ වගේම හිතනවා, කතා කරනවා, ඉගෙන ගන්නවා. හැමදාම උදේට මේ ළමයින්ව රෝද පුටුවල තද කරලා බැඳලා තමයි පන්තියට ගේන්නේ.

මේ ළමයින්ගෙන් විශේෂම කෙනෙක් ඉන්නවා, මෙලනි (Melanie) කියලා. මෙලනි හරිම බුද්ධිමත්. එයා එයාගේ ටීචර්, මිස් ජස්ටිනෝට (Miss Justineau) පණ වගේ ආදරෙයි. ඒත්, ඩොක්ටර් කෝල්ඩ්වෙල් (Dr. Caldwell) වගේ අයට ඕනේ මේ ළමයින්ව කපලා කොටලා, මේ ලෙඩේට බෙහෙතක් හොයාගන්න.

දවසක්, හිතපු නැති විදිහට ‘හන්ග්‍රීස්’ ලා මේ කඳවුරට කඩාගෙන පනිනවා. හැමදේම විනාශ වෙනවා. අන්තිමට, මෙලනි, එයාගේ ටීචර්, අර ඩොක්ටර්, සහ සැර සෙබළෙක් (සජන්ට් පාක්ස්) ඇතුළු කීප දෙනෙක් විතරක් එළියේ තියෙන භයානක ලෝකෙට පැනගන්නවා.

දැන් තමයි ඇත්ත ප්‍රශ්නේ පටන් ගන්නේ. එළියේ ලෝකේ මීට වඩා දරුණුයි. හැම තැනම ‘හන්ග්‍රීස්’ ලා. මේ පොඩි කෙල්ල, මෙලනි, ඇත්තටම කවුද? එයා මනුස්සයෙක්ද? නැත්නම් අලුත් වර්ගයේ රාක්ෂයෙක්ද? ඩොක්ටර්ට පුළුවන් වෙයිද මෙලනිව පාවිච්චි කරලා බෙහෙතක් හදන්න? නැත්නම් මෙලනිගේ ඇතුළේ ඉන්න ‘හන්ග්‍රී’ එළියට ඒවිද?