මැක්ස් කියන්නේ නිකම්ම බල්ලෙක් නෙවෙයි. එයා දැන් රාජකාරි කරන්නේ ඇමරිකාවේ ධවල මන්දිරයේ, ඒ කියන්නේ ජනාධිපති ඉන්න තැන. එයාගේ වැඩේ තමයි එහේ ආරක්ෂාව ගැන බලන එක.

මේ ධවල මන්දිරයේ ඉන්නවා ජනාධිපතිගේ දඟකාර පුතා, ටී.ජේ. (TJ). එයාට ඉතින් එහේ ජීවිතේ හරිම කම්මැලියි. හැබැයි මැක්ස් ආවට පස්සේ දෙන්නා හොඳ යාළුවෝ වෙනවා.
කතාව පටන් ගන්නේ රුසියාවේ ජනාධිපති එයාගේ දුව, ඇලෙක්සැන්ඩ්‍රා (Alex) එක්ක ධවල මන්දිරයට එන තැනින්. ටී.ජේ.ට තමයි රාජකාරිය භාරවෙන්නේ ඇලෙක්ස්ව හොඳට බලාගන්න. හැබැයි ඉතින් මුල ඉඳන්ම මේ ළමයි දෙන්නා අතර පොඩි පොඩි මතගැටුම් යනවා.

ඔය අතරේ, මැක්ස්ටයි ටී.ජේ.ටයි මොකක්දෝ ලොකු අවුලක් තේරෙනවා. ධවල මන්දිරය ඇතුළෙම මොකක් හරි භයානක කුමන්ත්‍රණයක් දියත් වෙනවා වගේ සුවඳක් එයාලට දැනෙනවා. කවුරුහරි මේ වැදගත් අමුත්තන්ව ඉලක්ක කරනවා වගේ.

දැන් ඉතින්, වැඩිහිටියෝ කවුරුත් දන්නේ නැති මේ භයානක සැලැස්ම නවත්තන්න වෙන්නේ මේ ළමයි දෙන්නාටයි, වීර බල්ලා මැක්ස්ටයි තමයි. එයාලට මේක තනියම කරන්න පුළුවන් වෙයිද? ධවල මන්දිරය ඇතුළෙම ඉන්න මේ හතුරා කවුද?