මේක ටිකක් දරුණු, ඇඟ කිලිපොලා යන ජාතියේ කතාවක්. විශේෂම දේ තමයි මේක ඇත්ත සිදුවීමක් පාදක කරගෙන හදපු ෆිල්ම් එකක් වීම.

හිතන්නකෝ, ඔයා සාමාන්‍ය ජීවිතයක් ගෙවන ටීන්ඒජ් කෙල්ලෙක්. ඔයාගේ නම හෙදර් රොබින්සන්. ඔයා හිතන් ඉන්නේ ඔයාගේ පවුල හරිම සාමාන්‍ය, හොඳ පවුලක් කියලා. හැබැයි එක දවසක ඔයාට දැනගන්න ලැබෙනවා ඔයා ඇත්තටම ඒ පවුලේ ළමයෙක් නෙවෙයි, ඔයාව ‘ඇඩොප්ට්’ කරලා, ඒ කියන්නේ හදාගන්න අරන් තියෙන්නේ කියලා.
හරි, ඒකත් අවුලක් නෑ කියමුකෝ.

නියම බෝම්බේ පත්තුවෙන්නේ ඊට පස්සේ. ඔයාට ටික ටික තේරුම් යනවා, ඔයාව හදා වඩා ගත්ත පවුලේ ප්‍රධානියෙක්—සමහරවිට ඔයා ‘මාමා’ කියලා ආදරේට කතා කරපු කෙනා—ඇත්තටම කවුද කියලා. මිනිහා භයානක අපරාධකාරයෙක්, අනුක්‍රමික ඝාතකයෙක් (සීරියල් කිලර්) කියලා ආරංචි වෙනවා.

එතකොට… ඔයාගේ ඇත්ත අම්මයි තාත්තයි කෝ? එයාලට මොකද වුණේ? ඔයාව ඇයි මේ අපරාධකාරයා ළඟට ආවේ? හෙදර්ට තේරෙනවා එයාගේ මුළු අතීතයම එකම බොරුවක් කියලා. එයා පටන් ගන්නවා තනියම මේ බය හිතෙන රහස් හොයන්න. ෆිල්ම් එක යන්නේ එයා ඇත්ත හොයාගන්න දරන උත්සාහය ගැනයි. බලනකම්ම කුතුහලයෙන් ඉන්න පුළුවන්.
මේ ෆිල්ම් එක අධ්‍යක්ෂණය කරලා තියෙන්නේ ලී ගැබියානා (Lee Gabiana).

ප්‍රධාන චරිත, ඒ කියන්නේ හෙදර් රොබින්සන් විදිහට රේචල් ස්ටබින්ටන් (Rachel Stubington) රඟපානවා. අර අඳුරු, භයානක චරිතෙට (ජෝන් රොබින්සන්) පණ පොවන්නේ ප්‍රවීණ නළු ස්ටීව් ගටන්බර්ග් (Steve Guttenberg). ඊට අමතරව ජානා ක්‍රේමර් (Jana Kramer) වගේ අයත් රංගනයෙන් දායක වෙනවා.