“Ghost Stories” (2017) කියන්නේ පට්ටම කුතුහලයක් තියෙන හොල්මන් කතාවක්. මේක බලලා නැති කෙනෙක්ට වුණත් රසවිඳින්න පුළුවන් විදිහට මම කතාව පොඩ්ඩක් කියන්නම්.

කතාවේ ප්‍රධාන චරිතය තමයි මහාචාර්ය ගුඩ්මන්. මෙයා කියන්නේ හොල්මන්, අවතාර, භූත බලවේග මේ හැමදේම බොරු කියලා ඔප්පු කරන කෙනෙක්. එයාගේ රස්සාවම තමයි ඔය වගේ දේවල් පස්සේ ගිහින් ඒවා පිටිපස්සේ තියෙන ඇත්ත හොයලා, මිනිස්සුන්ව දැනුවත් කරන එක.
දවසක් මෙයාට අමුතු පාර්සලයක් එනවා. ඒකෙ තියෙන්නේ කවදාවත් විසඳගන්න බැරිවුණු අභිරහස් හොල්මන් කේස් තුනක් ගැන විස්තර. ගුඩ්මන් මේක අභියෝගයක් විදිහට අරගෙන, මේ කේස් තුන ගැන හොයන්න පටන් ගන්නවා.

පළවෙනි කතාව රෑ මුරකාරයෙක්ගේ. දෙවෙනි එක තරුණ කොල්ලෙක්ගේ. තුන්වෙනි එක සල්ලිකාර ව්‍යාපාරිකයෙක්ගේ. මේ තුන්දෙනාටම වෙලා තියෙන්නේ මාරම බය හිතෙන, පැහැදිලි කරන්න බැරි අත්දැකීම්.

ගුඩ්මන් මේ කතා තුන හොයාගෙන යනකොට, එයාටත් අමුතු අමුතු දේවල් වෙන්න පටන් ගන්නවා. එයාට තේරෙනවා මේ කතා තුන නිකන්ම නිකන් කතා නෙවෙයි, මේ හැමදේම එයාගේ අතීතයේ හංගපු රහසකට සම්බන්ධයි කියලා. එතනින් එහාට වෙන්නේ මොකක්ද, ඒ කතා තුනයි ගුඩ්මන්ගෙයි සම්බන්ධය මොකක්ද කියන එක තමයි කතාවේ කුතුහලයම තියෙන තැන.

මේක අධ්‍යක්ෂණය කරලා තියෙන්නේ Jeremy Dyson සහ Andy Nyman. Andy Nyman තමයි ඔය මහාචාර්ය ගුඩ්මන්ගේ චරිතෙත් කරන්නේ. ඊට අමතරව අපි දන්න කියන Martin Freeman (“Sherlock”, “Hobbit” වල හිටපු) වගේ නළුවොත් ඉන්නවා.