“Mission of Honor” (2018) කියන්නේ ඇත්තටම වෙච්ච සිදුවීමක් පාදක කරගත්ත සුපිරි ෆිල්ම් එකක්.

කතාව වෙන්නේ දෙවෙනි ලෝක යුද්දේ කාලේ. හිට්ලර් පෝලන්තය ආක්‍රමණය කළාට පස්සේ, එහේ හිටපු දක්ෂම ගුවන් නියමුවෝ (pilots) කට්ටියක් එංගලන්තයට පැනලා එනවා. මේ අයගේ එකම අරමුණ තමයි කොහොමහරි නාසීන්ට විරුද්ධව ආයෙත් සටන් කරන එක.

හැබැයි ලොකු අවුලක් තියෙනවා. එංගලන්තයේ රාජකීය ගුවන් හමුදාව (RAF) මේ පෝලන්ත කට්ටියව එච්චර ගණන් ගන්නේ නෑ. එයාලා හිතන්නේ මේගොල්ලෝ හරිම හිතුවක්කාර, නීති හරියට පිළිපදින්නේ නැති පිරිසක් කියලා.

ඒත් එක්කම “Battle of Britain” (එංගලන්තය බේරගැනීමේ ගුවන් සටන) පටන් ගන්නවා. නාසීන්ගේ ගුවන් ප්‍රහාර එන්න එන්නම සැර වෙනකොට, RAF එකට නියමුවෝ මදි වෙනවා.

ඔන්න ඔතනදී තමයි, අකමැත්තෙන් වුණත්, මේ පෝලන්ත නියමුවන්ට අවස්ථාවක් දෙන්න එයාලට සිද්ධ වෙන්නේ. “303 Squadron” කියලා විශේෂ බලඝණයක් හදනවා. බ්‍රිතාන්‍යයන්ට වඩා හාත්පසින්ම වෙනස් විදිහකට සටන් කරන මේ කොල්ලෝ ටික, නාසීන්ගේ ගුවන් යානා එක දිගට බිම දාන්න පටන් ගන්නවා.

තමන්ගේම රට නැතිවෙලා, තමන්ව ගණන් නොගත්ත රටක් වෙනුවෙන් මේ අය ඇයි මෙච්චර කැපවීමක් කරන්නේ? මේ අසාමාන්‍ය වීරයන්ට මොකද වුණේ? ඒක තමයි කතාව.

මේක අධ්‍යක්ෂණය කරලා තියෙන්නේ ඩේවිඩ් බ්ලෙයාර් (David Blair).
ප්‍රධාන නළුවෝ විදිහට ඉවාන් රියොන් (Iwan Rheon) (ඔයා මෙයාව “Game of Thrones” එකේ රැම්සේ බෝල්ටන් විදිහට දැකලා ඇති) සහ මයිලෝ ගිබ්සන් (Milo Gibson) (ඔව්, මෙල් ගිබ්සන්ගේ පුතා) රඟපානවා.