“Son of God” (2014) මේක ඇවිල්ලා අපි හැමෝම වගේ දන්න කතාවක්, ඒ කියන්නේ යේසුස් වහන්සේගේ ජීවිත කතාව පදනම් කරගෙන හදපු චිත්‍රපටියක්.

මේකේ අධ්‍යක්ෂකවරයා තමයි ක්‍රිස්ටෝපර් ස්පෙන්සර් (Christopher Spencer). ජේසුස් වහන්සේගේ ප්‍රධාන චරිතයට පණ පොවන්නේ ඩියෝගෝ මෝර්ගාඩෝ (Diogo Morgado) කියන නළුවා. ඊට අමතරව රෝමා ඩව්නි (Roma Downey) (මරියා මව්තුමිය විදියට) වගේ අයත් රංගනයෙන් දායක වෙනවා.

කතාව ගැන කිව්වොත්, මේක පටන් ගන්නේ උන්වහන්සේගේ මුල් කාලයේ ඉඳන්. කොහොමද එතුමා තමන්ගේ ගෝලයන් ටික එකතු කරගන්නේ, දුප්පත් මිනිස්සුන්ට උදව් කරන්නේ, උගන්වන්නේ, ඒ වගේම ගොඩක් දෙනෙක්ව පුදුම කරපු ආශ්චර්යයන් (miracles) කරන්නේ කියලා මේකේ අපිට බලාගන්න පුළුවන්.

හැබැයි ඉතින්, මේ දේවල් හැමෝටම ඇල්ලුවේ නැහැ. එතුමාගේ ජනප්‍රියත්වය වැඩිවෙනකොට, එදා හිටපු බලවත් ආගමික නායකයෝ එතුමාට විරුද්ධ වෙන්න පටන් ගන්නවා. එයාලා දකිනවා මිනිස්සු තමන්ව අතෑරලා එතුමා වටා එකතු වෙනකොට තමන්ගේ බලය නැතිවෙයි කියලා.
ඉතින්, ලොකු කුමන්ත්‍රණයක් දියත් වෙනවා. එතුමාගේම කෙනෙක් එයාව පාවා දෙනවා. ඊට පස්සේ රෝම ආණ්ඩුකාරයා ළඟට ගෙනියලා දරුණු චෝදනාවක් එල්ල කරනවා.

ඇත්තටම එතුමාට මොන වගේ ඉරණමක් අත්වෙයිද? අර විරුද්ධවාදීන්ගේ සැලැස්ම සාර්ථක වෙයිද? ෆිල්ම් එක බලලම තමයි ඒ කුතුහලය තියාගන්න ඕනේ. (මේක ඇත්තටම ‘The Bible’ කියන ජනප්‍රිය ටීවී සීරීස් එකේ කොටස් එකතු කරලා හදපු නිර්මාණයක්.)