ඔන්න අද මම අරගෙන ආවේ 2022 අවුරුද්දේ නිකුත් වුණු ත්‍රාසජනක අත්දැකීමක් දෙන ෆිල්ම් එකක්. මේකේ නම තමයි “තෝරාගන්න… නැත්නම් මැරෙන්න” (Choose or Die) කියන එක.
මේක අධ්‍යක්ෂණය කරලා තියෙන්නේ Toby Meakins විසින්. ප්‍රධාන චරිත වලට අපි කවුරුත් දන්න Asa Butterfield (Sex Education එකේ ඉන්න කෙනා) සහ Iola Evans රංගනයෙන් දායක වෙනවා.

දැන් අපි කතාව පැත්තට හැරෙමු. මේකේ ප්‍රධාන චරිතය කයිලා. එයා ගොඩක් ආර්ථික ප්‍රශ්න මැද්දේ ඉන්න තරුණියක්. දවසක් එයාට අහම්බෙන් හම්බවෙනවා 80 දශකයේ පරණ කම්පියුටර් ගේම් එකක්. මේ ගේම් එකේ නම “CURS>R”. මේ ගේම් එක දිනුවොත් ලොකු මුදල් ත්‍යාගයක් දෙනවා කියලා දැනගත්තම, සල්ලි ප්‍රශ්න නිසාම කයිලා මේක ප්ලේ කරන්න පටන් ගන්නවා.

හැබැයි ටික වෙලාවක් යද්දි එයාට තේරෙනවා මේක සාමාන්‍ය ගේම් එකක් නෙවෙයි කියලා. ගේම් එකේ තියෙන්නේ අමුතුම තේරීම් ටිකක්. හැබැයි ප්‍රශ්නේ තියෙන්නේ ඒ තේරීම් එයාගේ ඇත්ත ජීවිතේට බලපාන එකයි. ගේම් එකේ එන හැම “Level” එකකදීම එයාට දරුණු තීරණ ගන්න සිද්ධ වෙනවා. එක්කෝ එයාට තව කෙනෙක්ට රිද්දන්න වෙනවා, නැත්නම් එයාට මැරෙන්න වෙනවා.

ගේම් එක නවත්තන්න හැදුවට වැඩක් නෑ, මොකද මේක ඇත්ත ලෝකෙත් එක්ක සම්බන්ධ වෙලයි තියෙන්නේ. කයිලා එයාගේ යාළුවා අයිසැක් එක්ක එකතු වෙලා මේ ශාපලත් ගේම් එකේ රහස හොයන්න පටන් ගන්නවා.

මේ ගේම් එක පිටිපස්සේ ඉන්නේ කවුද? ඇයි මේ වගේ භයානක ගේම් එකක් හැදුවේ? කයිලාට පුළුවන් වෙයිද ජීවිතේ බේරගන්න? මේ ටික දැනගන්න නම් ඔයාලට මේ ෆිල්ම් එක බලන්නම වෙනවා.