හිතන්නකෝ, කතාව වෙන්නේ අනාගතයේ. ඒ වෙනකොට පෘථිවිය සම්පූර්ණයෙන්ම විනාශ වෙලා, මිනිස්සු ජීවත් වෙන්නේ අභ්‍යවකාශයේ හදපු, සෙනඟ පිරුණු මධ්‍යස්ථානවල. මේ හැමෝගෙම තියෙන එකම හීනය තමයි ‘රියා’ (Rhea) කියලා හඳුන්වන දුර තියෙන සුන්දර ග්‍රහලෝකෙක පදිංචියට යන එක.

කතාවේ ප්‍රධාන චරිතය තමයි ලෝරා පෝට්මන්. එයා තරුණ දොස්තරවරියක්. එයා ‘කසන්ඩ්‍රා’ (Kassandra) කියන අති විශාල, බඩු ගෙනියන අභ්‍යවකාශ නැවක සේවයට බැඳෙනවා. මේ ගමනට අවුරුදු 8ක් විතර යනවා. ඉතින් නැවේ කාර්ය මණ්ඩලය කරන්නේ වැඩි කාලයක් ‘ක්‍රයෝ-ස්ලීප්’ (විශේෂ ගැඹුරු නින්දක්) එකේ ඉන්න එක. හැම වෙලේම ඇහැරිලා ඉන්නේ මුරය තියෙන කෙනා විතරයි.

ලෝරා එයාගේ මුරය අතරතුර ඉද්දි, එයාට තේරෙනවා නැවේ බඩු තියෙන අති විශාල තට්ටුවේ (cargo hold) මොකක්දෝ අමුතු දෙයක් වෙනවා කියලා. එයාට තනියම මේක හොයන්න බැරි නිසා අනිත් අයවත් ඇහැරවනවා.

මෙයාලා හිතාගෙන ඉන්නේ නැවේ තියෙන්නේ ‘රියා’ ග්‍රහලෝකය හදන්න අවශ්‍ය කරන බඩු කියලා. ඒත්, නැව ඇතුළේ එයාලා දකින්නේ කවදාවත් බලාපොරොත්තු වුණු දෙයක් නෙවෙයි. එයාලා හොයාගන්නවා නැවේ හංගපු ලොකු රහසක්. ඇත්තටම මේ නැව ගෙනියන ‘බඩුව’ මොකක්ද? අර හැමෝම යන්න ආස කරන ‘රියා’ කියන තැන ඇත්තටම මොකක්ද? කතාව යන්නේ ඒ කුතුහලයත් එක්කයි.

මේක Ivan Engler සහ Ralph Etter කියන දෙන්නෙක් එකතු වෙලා අධ්‍යක්ෂණය කරපු (Swiss) චිත්‍රපටියක්. Anna Katharina Schwabroh (ලෝරා විදිහට) සහ Martin Rapold වගේ අය තමයි ප්‍රධාන චරිත නිරූපණය කරන්නේ.