මුලින්ම මේකේ කාස්ට් එක ගැන කිව්වොත්, මේක රොබින් රයිට්ගේ (Robin Wright) විශිෂ්ට වැඩක් කියලා කියන්න පුළුවන්. මොකද මේ ෆිල්ම් එක අධ්‍යක්ෂණය කරන්නෙත්, ප්‍රධාන චරිතය වන ‘ඊඩී’ (Edee) විදිහට රඟපාන්නෙත් එයාමයි. ඒ වගේම ඩෙමියන් බිචිර් (Demián Bichir) කියන දක්ෂ නළුවා ‘මිගෙල්’ විදිහට මේකට එකතු වෙනවා.

කතාව මෙහෙමයි, ඊඩී කියන්නේ ලොකු කම්පනයකින්, ඒ කියන්නේ දරාගන්න බැරි දුකකින් ඉන්න කෙනෙක්. එයා තීරණය කරනවා කාත් එක්කවත් සම්බන්ධයක් නැතුව, ලෝකෙන්ම ඈත් වෙලා තනියම ජීවත් වෙන්න. ඉතින් එයා තමන්ගේ ෆෝන් එක පවා විසිකරලා දාලා, වයෝමිං (Wyoming) වල තියෙන හරිම පාළු, කැලෑවක් මැද තියෙන පොඩි ලී ගෙදරකට යනවා.

හැබැයි ප්‍රශ්නේ කියන්නේ, මේ වගේ කැලෑවක තනියම ජීවත් වෙන්න එයාට කිසිම පුරුද්දක් නෑ. දරුණු ශීත කාලය එනකොට කෑම හොයාගන්න බැරුව, සීතල දරාගන්න බැරුව එයා අන්ත අසරණ වෙනවා. ඇත්තටම එයා මරණය පෙනි පෙනී ඉන්නේ.

ඔන්න ඔය වෙලාවේ තමයි මිගෙල් කියන දඩයක්කාරයා එයාට හම්බෙන්නේ. මිගෙල් තමයි ඊඩීව මරණයෙන් බේරගන්නේ. හැබැයි එයා නිකන්ම උදව් කරලා යන්නේ නෑ. මේ කටුක පරිසරයේ ජීවත් වෙන්නේ කොහොමද, දඩයම් කරන්නේ කොහොමද කියලා එයා ඊඩීට කියලා දෙනවා.

මේ දෙන්නා අතර ගොඩනැගෙන යාළුකම හරිම ලස්සනයි වගේම හරිම ගැඹුරුයි. තමන්ගේ අතීතය අමතක කරලා ආපු ඊඩීට, ආයෙමත් ජීවිතේට ආදරේ කරන්න මිගෙල් නිසා පුළුවන් වෙයිද? අවසානයේ එයා ආයෙත් සමාජයට යයිද, නැත්නම් කැලේම නවතීද? ඒක දැනගන්න නම් මේ චිත්‍රපටිය බලන්නම වෙනවා. මේක ඇක්ෂන් ෆිල්ම් එකක් නෙවෙයි, හිතට දැනෙන ලස්සන අත්දැකීමක්.