මේක යුද්ධය ගැන ෆිල්ම් එකක් වුනාට, අපි සාමාන්‍යයෙන් දකින යුධ චිත්‍රපටවලට වඩා ගොඩක් වෙනස්, හරිම සංවේදී කතාවක්.

මේකේ ප්‍රධාන චරිතය තමයි Will Montgomery. එයා ඉරාක යුද්ධයේ ඉඳලා ආපහු ගෙදර එනවා. හැබැයි එයාට ලැබෙන්නේ හරිම අමාරු රාජකාරියක්. ඒ තමයි, යුද්ධයේදී මියගිය සෙබළුන්ගේ පවුල්වල අයට ඒ දුක්බර ආරංචිය කියන එක. මේක හිතනවා වගේ ලේසි වැඩක් නෙවෙයි. එක එක පවුල් මේ ආරංචිය දරාගන්නේ විවිධ විදිහට. සමහරු කෑගහනවා, සමහරු නිහඬ වෙනවා, තවත් සමහරු තරහ ගන්නවා.

මේ රස්සාව කරද්දි Will ට එයාගේ හිතේ තියෙන පීඩනයත් එක්ක සටන් කරන්න වෙනවා. මෙහෙම ඉද්දි එයාට මුණගැහෙනවා යුද්ධයෙන් නැතිවුණු සෙබළෙක්ගේ බිරිඳක්. එයාගේ නම Olivia. ඇයත් එක්ක Will ගොඩනඟාගන්න සම්බන්ධය නිසා කතාව ගොඩක් සංකීර්ණ වෙනවා. රාජකාරියයි, මනුස්සකමයි අතර හිරවෙන මේ දෙන්නාගේ කතාව අන්තිම වෙනකම්ම කුතුහලයෙන් බලන්න පුළුවන්.

නළු නිළියන් සහ අධ්‍යක්ෂණය: මේකේ Ben Foster තමයි Will ගේ චරිතයට පණ පොවන්නේ. එයාගේ රඟපෑම අති විශිෂ්ටයි. එයාගේ ජ්‍යෙෂ්ඨ නිලධාරියා විදිහට ඉන්නේ ප්‍රවීණ නළු Woody Harrelson. එයා මේ චරිතය වෙනුවෙන් ඔස්කාර් සම්මානයකටත් නිර්දේශ වුනා. Olivia ගේ චරිතය කරන්නේ Samantha Morton.

චිත්‍රපටය අධ්‍යක්ෂණය කරලා තියෙන්නේ Oren Moverman. එයා මේ සංවේදී මාතෘකාව හරිම ලස්සනට හසුරුවලා තියෙනවා.