ඔන්න යාළුවනේ, 2018 වර්ෂයේ තිරගත වුණු, හැමෝම බඩ අල්ලගෙන හිනාවුණු සුපිරිම හින්දි චිත්‍රපටයක් ගැන තමයි අද කියන්නේ. මේක අධ්‍යක්ෂණය කළේ Amit Sharma විසින්. ඒ වගේම බොලිවුඩයේ වෙනස්ම විදිහේ චිත්‍රපට තෝරාගන්න Ayushmann Khurrana එක්ක Neena Gupta, Gajraj Rao, Sanya Malhotra සහ අමතක නොවන රඟපෑමක් කරන Surekha Sikri මෙහි ප්‍රධාන චරිත වලට පණ පොවනවා.

කතාව මොකක්ද? නකුල් (Ayushmann) කියන්නේ හොඳ රස්සාවක් කරන, තව ටික කාලෙකින් කසාදයක් බැඳලා සෙට් වෙන්න ඉන්න තරුණයෙක්. එයාගේ අම්මයි තාත්තයි මැදි වයසේ පහු කරන යුවළක්. දවසක් නකුල්ට අහන්න ලැබෙනවා එයාගේ ජීවිතේට අහන්න ලැබෙයි කියලා හිතපු නැති ආරංචියක්. ඒ තමයි, එයාගේ වයසක අම්මා ආයෙත් ප්‍රෙග්නන්ට් කියන එක!

හිතලා බලන්නකෝ, තමන්ගේ ලොකු පුතා කසාද බඳින්න ඉන්න වයසකදී අම්මටයි තාත්තාටයි ආයෙත් දරුවෙක් ලැබෙන්න එනවා කිව්වම කොහොමද තත්වේ? මේ සිද්ධිය නිසා නකුල්ට සමාජයට, අසල්වැසියන්ට වගේම තමන්ගේ ඔෆිස් එකේ අයට මූණ දෙන්න බැරි ලැජ්ජාවක් ඇති වෙනවා. ගෙදර ආච්චි අම්මාගේ බැනුම් මැද්දේ, සමාජයේ “කින්ඩි” හිනා මැද්දේ මේ පවුල ලොකු අර්බුදයකට යනවා.

නකුල් තමන්ගේ අම්මයි තාත්තයි එක්ක තරහ වෙයිද? අන්තිමට මේ වයසක යුවළ දරුවා හදාගන්නවද, නැත්තම් සමාජයට බයේ මේක නැති කරනවද? පවුලේ බැඳීම්, ආදරය සහ විහිළු තහළු මැද්දේ ගලාගෙන යන මේ අපූරු කතාවේ අවසානය දැනගන්න නම් Badhaai Ho අනිවාර්යයෙන්ම බලන්න වෙනවා. පවුලේ සැමට එකට ඉඳගෙන බලන්න පුළුවන්, හිනා වෙවී ඇස් වලට කඳුලක් උනන ලස්සන චිත්‍රපටයක්!