Thriller සහ Mystery චිත්‍රපට වලට කැමති ඔයාලට, හුස්ම හිරකරගෙන බලන්න පුළුවන් පට්ටම ෆිල්ම් එකක් තමයි In Darkness කියන්නේ. ලන්ඩන් නගරයේ අඳුරු පැත්ත සහ පලිගැනීමක් වටා ගෙතුණු මේ කතාව ඔයාලව පුදුම කරවනවා ෂුවර්.

නළු නිළියන් සහ අධ්‍යක්ෂකවරයා: මේ චිත්‍රපටය අධ්‍යක්ෂණය කරලා තියෙන්නේ Anthony Byrne විසින්. Game of Thrones බලපු අයට නම් Natalie Dormer ව අමතක වෙන්න විදිහක් නෑනේ, මේකේ ප්‍රධාන චරිතය (Sofia) කරන්නේ එයා. ඊට අමතරව Deadpool චිත්‍රපටයේ හිටපු Ed Skrein සහ Emily Ratajkowski වගේ දක්ෂ නළු නිළියන් මේකට රංගනයෙන් දායක වෙනවා.

කතාව ගැන පොඩ්ඩක්: සොෆියා කියන්නේ ඇස් පෙනීම නැති දක්ෂ පියානෝ වාදකයෙක්. එයා ජීවත් වෙන්නේ ලන්ඩන් වල තියෙන ඇපාර්ට්මන්ට් එකක තනියම. මෙයාට ඇස් පෙනෙන්නේ නැති වුණාට, අනිත් අයට වඩා හොඳට දේවල් “ඇහෙනවා”. දවසක් සොෆියාට එයාගේ උඩ තට්ටුවේ ඉන්න අසල්වැසියා (Veronique) එක්ක කවුරුහරි රණ්ඩු වෙන සද්දයක් ඇහෙනවා. ඊට ටික වෙලාවකට පස්සේ ඒ ගෑනු ළමයා ඇපාර්ට්මන්ට් එකෙන් පහළට වැටිලා මිය යනවා.

මේ මරණයත් එක්කම සොෆියා නොදැනුවත්වම පාතාල ලෝකයේ ලොකු අබිරහසකට මැදි වෙනවා. පොලිසිය හිතන්නේ මේක සියදිවි නසාගැනීමක් කියලා. හැබැයි සොෆියා දන්නවා එතන වුණේ වෙන දෙයක් කියලා. ප්‍රශ්නේ තියෙන්නේ, ඇස් පෙනෙන්නේ නැති සොෆියාට මේ මිනීමරුවන්ගෙන් බේරෙන්න පුළුවන් වෙයිද? ඒ වගේම තමයි, සොෆියා කියන්නේ ඇත්තටම නිකම්ම අහිංසක පියානෝ වාදකයෙක් විතරද? නැත්නම් එයා ගාවත් අපි නොදන්න භයානක රහසක් තියෙනවද?