ජීවිතේ කියන්නේ සල්ලි විතරද? මේ ප්‍රශ්නේ ගැන හරි ලස්සනට කතා කරන චිත්‍රපටයක් තමයි The Ultimate Gift. කතාවේ ප්‍රධාන චරිතය ජේසන් ස්ටීවන්ස්. ජේසන් කියන්නේ කටේ රිදී හැන්දක් නෙවෙයි, රත්තරන් හැන්දක් අරගෙන ඉපදුණු කොල්ලෙක්. එයාගේ සීයා, රෙඩ් ස්ටීවන්ස් කියන්නේ මහා කෝටිපතියෙක්. ජේසන් හිතාගෙන ඉන්නේ සීයා මැරුණට පස්සේ ඒ කෝටි ගණන් දේපළ නිකම්ම තමන්ට ලැබෙයි කියලා. මොකද ජේසන් කිසිම දවසක මහන්සි වෙලා වැඩ කරපු කෙනෙක් නෙවෙයි.

හැබැයි සීයා මැරුණට පස්සේ ජේසන්ට ලොකු ෂොක් එකක් ලැබෙනවා. සීයාගේ අන්තිම කැමැත්ත කියවන වෙලාවේ, අනිත් හැමෝටම දේපළ ලැබුණත් ජේසන්ට ලැබෙන්නේ වෙනම දෙයක්. සීයා කලින් රෙකෝඩ් කරපු වීඩියෝ මාලාවක් හරහා ජේසන්ට අභියෝගයක් දෙනවා. සීයා කියන්නේ “මට ඔයාට දෙන්න තෑග්ගක් තියෙනවා, හැබැයි ඒක ගන්න නම් ඔයා මේ පරීක්ෂණ ටික පාස් කරන්න ඕන” කියලා. මේකට කියන්නේ “තෑගි 12” කියලා.

මේ ගමන ජේසන්ට ලේසි වෙන්නේ නෑ. එයාට තමන්ගේ සුඛෝපභෝගී ජීවිතේ අතඇරලා, පොළොවේ පස් කපන්න, දුප්පත් මිනිස්සුන්ගේ දුක හඳුනාගන්න, යාළුකම කියන්නේ මොකක්ද කියලා තේරුම් ගන්න සිද්ධ වෙනවා. මේ ගමනේදි එයාට එමිලි කියලා පොඩි ළමයෙක්ව මුණගැහෙනවා. ඒ ළමයා නිසා ජේසන්ගේ ජීවිතේ සම්පූර්ණයෙන්ම වෙනස් වෙනවා. ඇත්තටම සීයා දෙන්න හදන ඒ “අවසාන තෑග්ග” මොකක්ද? ඒක සල්ලිද? නැත්නම් ඊට වඩා වටිනා දෙයක්ද? හිතට දැනෙන, ඇහැට කඳුලක් එන සංවේදී කතාවක් හොයන කෙනෙක්ට මේක ඉතාම හොඳ චිත්‍රපටයක්.

Director: Michael O. Sajbel
Cast: Drew Fuller, James Garner, Abigail Breslin, Ali Hillis