මේක අධ්‍යක්ෂණය කරන්නේ ප්‍රසිද්ධ බ්‍රයන් ඩි පල්මා (Brian De Palma). ප්‍රධාන චරිත දෙක කරන්නේ රෙබෙකා රොමෙයින් (Rebecca Romijn) සහ ඇන්ටෝනියෝ බන්ඩේරාස් (Antonio Banderas).

ලෝරා ඈෂ් (රෙබෙකා) කියන්නේ කපටි, සුපිරිම ගණයේ හොරෙක්. එයා කාන්ස් (Cannes) සිනමා උළෙලකදී, ලොකු දියමන්ති සෙට් එකක් හොරකම් කරන මහා සැලැස්මක කොටස්කාරියක්. හැබැයි, මෙයා කරන්නේ තමන්ගේ සෙට් එකටම ‘ගේම දීලා’, දියමන්ති ටිකත් අරගෙන මාරු වෙන එක.

එතනින් පැනලා යන මෙයා, අහම්බෙන් එයා වගේම පේන ‘ලිලී’ කියලා ගෑණු ළමයෙක්ගේ අනන්‍යතාවය අරගන්නවා. ‘ලිලී’ කියන්නේ සියදිවි නසාගන්න ගිය කෙනෙක්.

කතාව අවුරුදු හතක් ඉස්සරහට යනවා. දැන් ලෝරා ‘ලිලී’ විදිහට, ඇමරිකානු තානාපති කෙනෙක්ව (පීටර් කොයෝට්) බැඳලා, පැරිසියේ හරිම වැදගත් විදිහට ජීවත් වෙනවා. එයාගෙ පරණ ජීවිතේ සම්පූර්ණයෙන්ම අමතක කරලා.

හැබැයි ප්‍රශ්නේ පටන් ගන්නේ එතනින්. නිකොලස් බාර්ඩෝ (ඇන්ටෝනියෝ) කියන පපරාසි කෙනෙක්, මෙයා කවුද කියලා නොදැන, මෙයාගෙ ෆොටෝ එකක් ගන්නවා.

මේ එක ෆොටෝ එකක් නිසා, එයා අවුරුදු හතක් තිස්සේ හංගගෙන හිටපු හැමදේම එළිදරව් වෙන්නයි යන්නේ. එයා පාවලා දීපු අර පරණ සෙට් එක, තාමත් මෙයාගෙන් පළිගන්න බලාගෙන ඉන්නවා. ලෝරා මේකෙන් ගැලවෙයිද? ඇන්ටෝනියෝ බන්ඩේරාස් මේ කතාවට කොහොමද මැදි වෙන්නේ?