හිතන්නකෝ ඔයා හැමදාම මැරෙනවා, හැබැයි ආයෙත් වෙනත් කෙනෙක් විදිහට ඇහැරෙනවා කියලා. ඒක කොච්චර බය හිතෙන අත්දැකීමක්ද? ඉයන් ස්ටෝන් කියන තරුණයා මුහුණ දෙන්නේ අන්න ඒ වගේ අමුතුම අත්දැකීමකට. මේ චිත්‍රපටිය පටන් ගන්නේ ඉයන් පාලු පාරකදී අමුතු සතෙක් අතින් මැරුම් කන තැනින්. හැබැයි පුදුමෙ කියන්නේ ඊළඟ මොහොතේ එයා වෙනත් වෘත්තියක නියැලෙන, වෙනත් නමක් තියෙන කෙනෙක් විදිහට ආයෙත් පණ ලබන එක.

මේක නිකන් හීනයක් වගේ වුණාට ඒක ඇත්තක්. හැමදාම රෑ 5:00 වෙද්දී ඉයන්ව කවුරුහරි හඹා ඇවිත් මරලා දානවා. ඒත් හැම පාරම එයාට මතක තියෙනවා කලින් සැරේ තමන්ව මැරුවේ කවුද කියලා. මේ මැරෙන සහ ආයේ ඉපදෙන චක්‍රය ඇතුළේ ඉයන් උත්සාහ කරන්නේ මේක මොකක්ද කියලා හොයාගන්න. මේ හැම ජීවිතයකදීම එයාට මුණගැහෙන එකම එක ගැහැණු ළමයෙක් ඉන්නවා. ඒ කවුද? ඇයි මේ අද්භූත සත්තු ඉයන්ව මරන්න පස්සෙන් එන්නේ?

ඇත්තටම මේක හුදෙක් හොල්මන් කතාවක් නෙවෙයි, මේක පට්ටම “Action Thriller” එකක්. ඉයන් කියන්නේ ඇත්තටම කවුද කියන රහස එළිවෙද්දී ඔයා පුදුම වේවි. මේ අද්භූත සත්තු කවුද, ඔවුන්ට ඕන කරන්නේ මොනවාද කියලා දැනගන්න නම් මේ චිත්‍රපටිය අනිවාර්යයෙන්ම බලන්න ඕනේ. ඔයා සයන්ස් ෆික්ෂන් සහ හොරර් වර්ගයේ කතා වලට කැමති නම්, මේක ඔයාගේ ලිස්ට් එකේ උඩින්ම තියාගන්න පුළුවන් එකක්. කුතුහලය පිරුණු විනාඩි 90ක් ගත කරන්න මේක කදිම අවස්ථාවක්.