ඔබ තාක්ෂණයට, හැකින් (Hacking) වලට වගේම ත්‍රාසජනක අත්දැකීම්වලට ආස කරන කෙනෙක් නම් “Who Am I” කියන්නේ අනිවාර්යයෙන්ම බලන්න ඕන ෆිල්ම් එකක්. මේකේ කතාව ගෙතෙන්නේ බෙන්ජමින් කියන තරුණයා වටා. බෙන්ජමින් කියන්නේ ඇත්ත ජීවිතේදී කාටවත් පේන්නේ නැති, සමාජයට වැඩිය විවෘත නැති කොල්ලෙක්. හැබැයි පරිගණක ලෝකය ඇතුළේ ඔහු දක්ෂයෙක්. ඔහුට තමන්ගේම කියලා ලෝකයක් තියෙනවා.

දවසක් බෙන්ජමින්ට හම්බවෙනවා මැක්ස් කියලා හිතුවක්කාර, හැබැයි හරිම ක්‍රියාශීලී යාළුවෙක්. මැක්ස් එක්ක එකතු වෙලා බෙන්ජමින් තවත් යාළුවන් දෙන්නෙක් සම්බන්ධ කරගෙන “CLAY” කියලා හැකර් කණ්ඩායමක් හදාගන්නවා. මේ කණ්ඩායමේ එකම අරමුණ වෙන්නේ පද්ධති හැක් කරලා ලෝකයේ අවධානය දිනාගන්න එක. හැබැයි නිකම්ම හැක් කරන එක විතරක් නෙවෙයි, පොඩි විහිළුවකුත් එක්කමයි මේවා කරන්නේ. මුලින්ම ආතල් එකට පටන් ගන්න මේ වැඩේ හෙමින් හෙමින් බරපතළ පැත්තට හැරෙනවා.

ඔවුන් ජාත්‍යන්තර සයිබර් අපරාධකරුවන්ගේ සහ පොලිසියේ අවධානයට ලක් වෙනවා. එතනින් එහාට බෙන්ජමින්ට සහ කණ්ඩායමට මුහුණ දෙන්න වෙන්නේ ලේසි පහසු දේවලට නෙවෙයි. කවුද ඇත්තටම බෙන්ජමින්? ඔහු කරන හැමදේම පිටුපස තියෙන්නේ මොකක්ද? මේ ෆිල්ම් එකේ තියෙන ලොකුම විශේෂත්වය තමයි අවසානය වෙනකල්ම අපිට හිතාගන්න බැරි විදිහේ වෙනස්කම් (Twists) සිද්ධ වෙන එක. ඔබ හිතන දේ නෙවෙයි අවසානයේ වෙන්නේ. ඉතින්, හැකින් ලෝකයේ අඳුරු පැත්ත බලන්න කැමති නම් මේක මරුම චිත්‍රපටයක්.