මේක නම් හදවතටම දැනෙන, ඇත්තම කතාවක් පදනම් කරගෙන හදපු ලස්සන චිත්‍රපටයක්. කතාව ගෙතෙන්නේ මෙක්සිකෝවේ තියෙන “Casa Hogar” කියන අනාථ නිවාසයක් වටා. මේක පවත්වාගෙන යන්නේ ඕමාර් (Omar) කියන මනුස්සයා. හැබැයි ලොකු ප්‍රශ්නයක් තියෙනවා. ණය බර නිසා මේ අනාථ නිවාසය වැහෙන්නයි යන්නේ. එහෙම වුණොත් එතන ඉන්න අහිංසක ළමයින්ට යන එන මං නැති වෙනවා.

මේ වෙලාවේ තමයි ඕමාර්ටයි ළමයින්ටයි අමුතු අවස්ථාවක් ලැබෙන්නේ. ඒ තමයි ලෝකයේ තියෙන ලොකුම මාලු ඇල්ලීමේ තරගයකට (Bisbee’s Black & Blue Tournament) සහභාගී වෙන්න. හැබැයි මුන්ට මාලු අල්ලන්න තියා බෝට්ටුවක් පදවන්නවත් හරියට දන්නේ නැහැ. අන්තිමේදී මෙයාලට උදව්වට එන්නේ කලින් මේ තරගය දිනපු, හැබැයි දැන් ටිකක් අසාර්ථක වෙලා ඉන්න කැප්ටන් කෙනෙක්.

කැප්ටන් වොඩ් (Captain Wade) සහ මේ අනාථ නිවාසයේ ළමයි ටික එකතු වෙලා මුහුද මැද කරන සටන තමයි මේකේ තියෙන්නේ. මුහුදේ රළු රළ පහරවල් එක්ක සටන් කරන අතරේ, මෙයාලට තමන්ගේ ඇතුළේ තියෙන බය, සැකය එක්කත් සටන් කරන්න වෙනවා. මෙයාලට පුළුවන් වෙයිද අර ලොකුම මාලුවා අල්ලලා අනාථ නිවාසය බේරගන්න ඕන කරන සල්ලි හොයාගන්න? විශ්වාසය සහ උත්සාහය ගැන කියන මේ කතාව බලද්දී ඔයාලගේ ඇසට කඳුලක් ඒවි.