ජැක් ලන්ඩන්ගේ (Jack London) සුප්‍රසිද්ධ නවකතාවක් ඇසුරින් නිර්මාණය වුණු මේ චිත්‍රපටය මුළු පවුලටම එකට ඉඳන් බලන්න පුළුවන් ලස්සන Adventure කතාවක්. මෙහි ප්‍රධාන චරිත සඳහා Christopher Lloyd, Timothy Bottoms සහ Veronica Cartwright රංගනයෙන් දායක වෙනවා. අධ්‍යක්ෂණය Richard Gabai විසිනි. (මෙය 2009 වසරේ නිකුත් වූ 3D චිත්‍රපටයයි).

කතාව මොකක්ද? සත්තුන්ට ආදරේ කරන අයට නම් මේක ඇස් දෙකේ කඳුළු පුරවන කතාවක්. කතාවේ ප්‍රධාන චරිතය තමයි බක් (Buck) කියන බල්ලා. බක් කියන්නේ හොඳට සැපට හැදුණු බල්ලෙක්. හැබැයි දෛවයේ සරදමකට වගේ එයාට සිද්ධ වෙනවා එයාගේ ගෙදරින් ඈත් වෙලා හිමෙන් වැහුණු, කටුක වනාන්තරයක ජීවත් වෙන්න. මේ 2009 වර්ෂන් එකේදී කතාව යන්නේ නූතන කාලයේ. රයන් (Ryan) කියන පුංචි කෙල්ල එයාගේ සීයා බලන්න මේ කටුක ප්‍රදේශයට එනවා. එතනදී තමයි එයාට තුවාල වෙලා ඉන්න බක්ව මුණගැහෙන්නේ.

මේ බල්ලා සහ රයන් අතර ඇතිවෙන බැඳීම හරිම පුදුමාකාරයි. ඒත් මේ වනාන්තරේ ලේසි නෑ. දරුණු දඩයම්කරුවන්, හිම කුණාටු වගේම තවත් භයානක දේවල් මේ දෙන්නා ඉස්සරහා තියෙනවා. ඒ වගේම බක්ට එයාගේ ඇඟේ දුවන වෘක ලේ නිසා වනාන්තරේ තියෙන “වනයේ කැඳවීම” (Call of the Wild) දැනෙන්න ගන්නවා. එයා ආපහු මිනිස්සු එක්ක ඉඳීවිද? නැත්නම් එයාගේ මුතුන් මිත්තෝ වගේ කැලේට යයිද? රයන්ට පුළුවන් වෙයිද බක්ව බේරගන්න? මේ චිත්‍රපටය බලද්දි අපිට තේරෙනවා මිනිස්සු සහ සත්තු අතර තියෙන බැඳීම කොච්චර බලවත්ද කියලා. සීයාගේ චරිතයට ඉන්න ක්‍රිස්ටෝපර් ලොයිඩ්ගේ රඟපෑමත් සුපිරි. පොඩි ළමයින්ට වගේම ලොකු අයටත් ජීවිතේ ගැන ගොඩක් දේවල් ඉගෙන ගන්න පුළුවන් හරිම ලස්සන, සංවේදී චිත්‍රපටයක්.