අපි හිතනවාට වඩා ලෝකය ගොඩක් කුරිරු වෙන්න පුළුවන්. Body Brokers (2021) චිත්‍රපටයෙන් හෙළි කරන්නේ ඇමරිකාවේ මත්ද්‍රව්‍ය පුනරුත්ථාපන මධ්‍යස්ථාන පිටුපස තියෙන මහා පරිමාණ දූෂිත ජාවාරමක් ගැනයි. කතාවේ ප්‍රධාන චරිතය වන යුටා (Utah) කියන්නේ මත්ද්‍රව්‍ය වලට ඇබ්බැහි වුණු තරුණයෙක්. ඔහුට තමන්ගේ ජීවිතය හදාගන්න උදව් කරන්න කෙනෙක් මුණගැහෙනවා. හැබැයි ඒ උදව්ව පිටුපස තියෙන්නේ වෙනමම අරමුණක්.

මේකේ “Body Brokers” ලා කරන්නේ මත්ද්‍රව්‍ය වලට ඇබ්බැහි වුණු අයව රක්ෂණ මුදල් ලබාගැනීම සඳහා පුනරුත්ථාපන මධ්‍යස්ථාන වලට විකුණන එකයි. මිනිස් ජීවිත කියන්නේ ඔවුන්ට නිකම්ම සල්ලි අච්චු ගහන මැෂින් විතරයි. යුටාත් පස්සේ කාලෙක මේ ජාවාරමේම කොටස්කරුවෙක් වෙනවා. සල්ලි පස්සේ යන මේ ගමනේදී ඔහුට තමන්ගේ මනුෂ්‍යත්වය අමතක වෙයිද? නැත්නම් මේ විනාශකාරී ජාලයෙන් ඔහුට ගැලවෙන්න පුළුවන් වෙයිද?

සත්‍ය සිදුවීම් පදනම් කරගෙන නිර්මාණය වුණු මේ චිත්‍රපටය බලනකොට අපිට හිතෙනවා ලෝකයේ මිනිස්සු කොයි තරම් පහත් තත්ත්වයට වැටෙනවද කියලා. මේකේ තියෙන වේගවත් බව සහ සමාජයට දෙන පණිවිඩය හරිම ප්‍රබලයි. වෛද්‍ය ක්ෂේත්‍රයේ සහ රක්ෂණ ක්ෂේත්‍රයේ තියෙන කළු පැත්ත ගැන දැනගන්න මේ චිත්‍රපටය බලන්නම ඕනේ. අවසානය දක්වාම කුතුහලය සහ ආතතිය උපරිමයෙන් තියෙන නිර්මාණයක් විදියට මේක හඳුන්වන්න පුළුවන්.