True Grit කියන්නේ 1800 ගණන්වල ඇමරිකාවේ බටහිර දිග ප්‍රදේශයේ (Wild West) සිද්ධ වෙන අසාමාන්‍ය පළිගැනීමක කතාවක්. මේකේ ප්‍රධාන චරිතය වෙන්නේ අවුරුදු 14ක මැටී රොස් කියන පුංචි ගැහැණු ළමයා. මැටීගේ තාත්තාව කවුරුහරි මරා දානවා. ඉතින් මේ පුංචි කෙල්ල තීරණය කරනවා තමන්ගේ තාත්තාව මරපු මිනිහාව කොහොම හරි හොයාගෙන නීතිය ඉදිරියට ගේන්න.

හැබැයි මේ වගේ භයානක ගමනක් තනියම යන්න බැරි නිසා, ඇය හොයාගෙන යනවා ඒ ප්‍රදේශයේ ඉන්න දරුණුම සහ දක්ෂම නිලධාරියෙක්ව. ඔහු තමයි රූස්ටර් කොග්බර්න්. ඔහු නිතරම බීමතින් ඉන්න, ටිකක් අමුතු මිනිහෙක් වුණත් ඔහුට ලොකු “ධෛර්යයක්” (Grit) තියෙනවා. මේ දෙන්නා එකතු වෙලා කරන මේ මෙහෙයුමට තවත් ටෙක්සාස් රේන්ජර් කෙනෙක් එකතු වෙනවා.

මිනීමරුවා හොයාගෙන යන මේ ගමන හරිම දුෂ්කරයි. පරණ තුවක්කු සටන්, අශ්වයෝ පිටේ යන දීර්ඝ ගමන් සහ රළු සොබාදහම මැද මේ පුංචි කෙල්ල පෙන්වන ධෛර්යය ඇත්තටම පුදුම සහගතයි. ඇයට තමන්ගේ තාත්තා වෙනුවෙන් සාධාරණය ඉටු කරන්න පුළුවන් වෙයිද? ඇය මුහුණ දෙන අන්තරායන් මොනවාද? කියන දේ මේ චිත්‍රපටිය බලද්දී ඔයාලට දැනගන්න පුළුවන්. මේකේ තියෙන රංගනයන් සහ කැමරාකරණය ඉතාම ඉහළ මට්ටමක තියෙනවා. පරණ පන්නයේ කතාවක් වුණත් අදටත් බලන්න පුළුවන් සුපිරිම නිර්මාණයක් තමයි මේ.