ඔයාලට ටිකක් හිනාවෙන්න, ඒ වගේම කුතුහලයෙන් යුතුව බලන්න පුළුවන් Crime Comedy වර්ගයේ චිත්‍රපටයක් තමයි “The Escape of Prisoner 614” (2018) කියන්නේ. මේ කතාව ගෙතෙන්නේ ඉතාමත් අහිංසක, හැබැයි කිසිම දේකට දක්ෂ නැති මෝඩ ෂෙරිෆ්වරු (පොලිස් නිලධාරීන්) දෙන්නෙක් වටායි. මේ දෙන්නගේ නරක වෙලාවට නගරයේ ඉන්න දරුණු, ඒ වගේම කිසිම වැරැද්දක් ඉවසන්නේ නැති ප්‍රධාන ෂෙරිෆ්වරයා මුන් දෙන්නව රක්ෂාවෙන් අයින් කරනවා. රක්ෂාව නැති වුණු නිසා මේ දෙන්නා ඉන්නේ සෑහෙන්න කනස්සල්ලෙන්.

ඔන්න ඔය අතරේ තමයි නගරයේ හිරගෙදරකින් 614 දරන සිරකරුවා පැනලා යනවා. ඉතින් අපේ මේ හිටපු නිලධාරීන් දෙන්නා හිතනවා තමන්ගේ නැතිවුණු රක්ෂාව නැවත ලබාගන්න කියාපු අවස්ථාව මේක තමයි කියලා. ඔවුන් තීරණය කරනවා කැලෑ වැදිලා හරි මේ පැනලා ගිය සිරකරුවාව අල්ලගෙන ඇවිත් තමන්ගේ ලොක්කාට බාරදෙන්න. කතාව ලස්සන වෙන්නේ ඔවුන් මේ සිරකරුවාව හොයාගෙන යන ගමනේදියි. නොසිතූ විදිහට ඔවුන්ට මේ සිරකරුවාව හමුවෙනවා. හැබැයි ඔහු සාමාන්‍ය දරුණු අපරාධකාරයෙක් නෙවෙයි.

ඔවුන් මේ සිරකරුවා එක්ක කාලය ගත කරද්දී තේරුම් ගන්නවා, ඔහු ඇත්තටම වරදක් නොකරපු, අසාධාරණ ලෙස හිරේට ගිය අහිංසක මනුස්සයෙක් කියලා. දැන් මේ මෝඩ ෂෙරිෆ්වරු දෙන්නා ලොකු උගුලක අහුවෙනවා. තමන්ගේ රක්ෂාව බේරගන්න මේ අහිංසක මිනිහව දරුණු ලොක්කාට බාර දෙනවාද? නැත්නම් ඔහුට නිදහස් වෙන්න උදව් කරනවාද? මේ තීරණය ගන්න ගියහම ඔවුන්ට මුහුණ දෙන්න වෙන සිදුවීම් මාලාව හරිම හාස්‍යජනකයි. කුතුහලයත්, හිනාවත් එකට කැටිවුණු මේ චිත්‍රපටය විවේකී වෙලාවක බලන්න නියම නිර්මාණයක්.