යාලුවෝ කට්ටියක් එක්ක විනෝද වෙන්න ගිහින් ජීවිතය බේරගන්න සටන් කරන්න වුණොත් කොහොමද? Escape Room (2017) කියන්නේ අන්න ඒ වගේ හිතාගන්න බැරි තරම් භයානක අත්දැකීමක් ගැන කියවෙන චිත්‍රපටයක්. (මතක තියාගන්න, මේක 2019 ආපු එක නෙවෙයි). මේ කතාවේ ටයිලර් කියලා කෙනෙක් ඉන්නවා. එයාගේ 30 වැනි උපන්දිනය සමරන්න එයාගේ පෙම්වතිය ක්‍රිස්ටන් හරි අපූරු තෑග්ගක් දෙනවා. ඒ තමයි “Escape Room” එකකට ගිහින් ප්‍රහේලිකා විසඳන ක්‍රීඩාවක්.

ටයිලර් සහ එයාගේ තවත් යාළුවෝ හතර දෙනෙක් මේ අභිරහස් කාමරයට ඇතුළු වෙන්නේ හරිම උද්‍යෝගයෙන්. නීති හරිම සරලයි – කාමර ඇතුළේ තියෙන ඉඟි හොයාගෙන නියමිත වෙලාව ඇතුළත එළියට එන්න ඕනේ. හැබැයි ටික වෙලාවක් යද්දී මේ අයට තේරෙනවා මේක සෙල්ලමක් නෙවෙයි කියලා. එක එක කාමරයේ තියෙන ප්‍රහේලිකා විසඳන්න බැරි වුණොත් ඒකෙන් වෙන්නේ කාට හරි තමන්ගේ ජීවිතයෙන් වන්දි ගෙවන්න.

මේ හැම කාමරයක්ම නිර්මාණය කරලා තියෙන්නේ හරිම දරුණු විදියට. එක වැරැද්දක් වුණොත් මරණය නියතයි. යාලුවෝ අතර තියෙන බැඳීම, විශ්වාසය මේ මරණීය උගුල් ඉස්සරහා නැති වෙලා යනවා. තමන්ගේම යාළුවෝ මිය යද්දී ඉතුරු වෙන අයට පුළුවන් වෙයිද මේ නපුරු සිහිනයෙන් බේරිලා යන්න? කවුද මේ හැමදේම පිටුපස ඉන්නේ? කුතුහලය සහ බය එකට මුසු වුණු මේ චිත්‍රපටය ඔයාලගේ ඇඩ්‍රිනලින් මට්ටම ඉහළටම අරන් යාවි.