Thriller සහ Gothic Horror රසිකයන් වෙනුවෙන්ම නිර්මාණය වුණු අපූරු චිත්‍රපටයක් තමයි The Manor (2021). කතාව ගෙතිලා තියෙන්නේ ජුඩිත් කියන වයසක, හැබැයි ස්වාධීනව ඉන්න කැමති කාන්තාව වටා. ඇයට සුළු ආඝාත තත්වයක් (Stroke) ඇති වුණාට පස්සේ, ඇය තීරණය කරනවා තමන්ගේ පවුලේ අයට බරක් නොවී විශ්‍රාමික නිවාසයක (Nursing Home) පදිංචියට යන්න. බැලූ බැල්මට මේක හරිම නිස්කලංක, සුන්දර මන්දිරයක්.

හැබැයි මේ මන්දිරයට ආවට පස්සේ ජුඩිත්ට ටිකෙන් ටික අමුතු දේවල් අත්දකින්න ලැබෙනවා. රෑ තිස්සේ කාමර ඇතුලේ සැරිසරන අද්භූත අඳුරු බලවේගයක්, මන්දිරයේ ඉන්න අනිත් වයසක අයගේ අමුතු හැසිරීම් ඇය නිරීක්ෂණය කරනවා. ඊටත් වඩා භයානක දේ තමයි, මේ මන්දිරයේ ඉන්න අය එකපාරටම අභිරහස් විදියට මිය යන්න ගන්නවා. ජුඩිත් මේ ගැන තමන්ගේ පවුලේ අයට සහ දොස්තරලාට කිව්වත්, හැමෝම හිතන්නේ වයස නිසා ඇයට අමතක වීමේ රෝගය (Dementia) හැදිලා පිස්සු කියවනවා කියලා.

තමන්ව කාටවත් විශ්වාස නැති තැන, ජුඩිත් තීරණය කරනවා තමන්ගේ මුණුපුරාගේ උදව් ඇතිව මේ මන්දිරයේ සැඟවිලා තියෙන අඳුරු රහස හොයන්න. ඒත් එක්කම ඇයට තේරෙනවා ඇයටත් එතනින් ලේසියෙන් බේරිලා යන්න හම්බවෙන්නේ නැහැ කියලා. මේ මන්දිරය ඇතුලේ ඇත්තටම වෙන්නේ මොකක්ද? වයසක අයව බිලිගන්නා ඒ අද්භූත බලවේගය කුමක්ද? කුතුහලය සහ බය එකට මුසු වුණු The Manor චිත්‍රපටය බලලම ඒ රහස විසඳගන්න.