1997 අවුරුද්දේ ආපු සුප්‍රකට Border චිත්‍රපටය මතක අයට මෙන්න නියම ආරංචියක්. වසර ගණනාවකට පස්සේ ඒ අමතක නොවන අත්දැකීම ආයෙමත් අලුත් කරමින් තමයි Border 2 රිලීස් වෙන්නේ. සනී ඩියෝල් නැවතත් තමන්ගේ ගර්ජනාත්මක රංගනයෙන් දායක වෙන මේ කතාවෙන් දිගහැරෙන්නේ ඉන්දියානු දේශසීමාවන් රකින්න තමන්ගේ ජීවිතය පරදුවට තබන රණශූරයන්ගේ නොකියූ වීරකථා සමූහයක්. මෙවර කතාව තවත් දැවැන්ත ලෙස සහ නවීන යථාර්ථවාදී යුධ ජවනිකා රැසකින් සමන්විතයි.

දේශසීමාවේ පවතින දැඩි පීඩනය, ඕනෑම මොහොතක පටන් ගන්න පුළුවන් භයානක යුද්ධයක පෙරනිමිති සහ තමන්ගේ ගෙවල්වල ඉන්න ආදරණීයයන්ගෙන් ඈත්වෙලා හිම තට්ටු මැද සහ කාන්තාරවල දේශසීමා රකින සෙබළුන්ගේ හැඟීම්බර අත්දැකීම් මෙහි ඉතා තදින් නිරූපණය වෙනවා. හදිසියේම එල්ලවන සතුරු ප්‍රහාරයක් හමුවේ, සීමිත පිරිසක් සහ සීමිත ආයුධ ප්‍රමාණයක් එක්ක සතුරන්ට මුහුණ දෙන්න ඔවුන්ට සිද්ධ වෙනවා.

ඔවුන්ට පුළුවන් වෙයිද සතුරු බලඇණි පරාජය කරලා තමන්ගේ දේශසීමාව සහ රටේ ගෞරවය ආරක්ෂා කරගන්න? නැත්නම් මේ දරුණු සටනින් ඔවුන්ගේ ජීවිත සදාකාලිකවම දේශසීමාවේ පස්වලට යටවෙලා යයිද? ඇඟේ මයිල් කෙළින් වෙන විදියේ දේශප්‍රේමී සටන් සහ සංවේදී සිදුවීම් පිරුණු මේ සිනමා පටය සිනමා ලෝලීන්ට අමතක නොවන අත්දැකීමක් වෙනවා නොඅනුමානයි.