Absolutely Anything (2015 මරු ආතල් කොමඩියක්. හිතන්නකෝ එකපාරටම ඔයාට ‘ඕනෑම දෙයක්’ කරන්න පුළුවන් බලයක් ලැබුණොත් මොකද කරන්නේ කියලා.

කතාව යන්නේ මෙහෙමයි: ලොකු බලයක් තියෙන පිටසක්වල ජීවීන් කට්ටියක් අපේ පෘථිවිය ගැන තීරණයක් ගන්න හදනවා. එයාලා බලනවා මනුස්සයෝ කියන්නේ හොඳ ජාතියක්ද, නැත්නම් විනාශ කරලා දාන්න ඕන ජාතියක්ද කියලා. මේක ටෙස්ට් කරන්න, එයාලා පොළොවෙන් නිකම්ම නිකම් කෙනෙක්ව තෝරගන්නවා.

මෙහෙම තෝරගන්නේ ‘නීල් ක්ලාක්’ කියලා සාමාන්‍ය ඉස්කෝලේ ටීචර් කෙනෙක්ව. පිටසක්වල ජීවීන් නීල්ට දෙනවා අසීමිත බලයක්. එයාට හිතෙන, කියන ඕනෑම දෙයක් කරන්න පුළුවන්.

හැබැයි අවුල තියෙන්නේ මෙතන. නීල් වගේ සාමාන්‍ය මනුස්සයෙක්ට මෙච්චර බලයක් ලැබුණම එයා මොනවා කරයිද? නීල් මේ බලය පාවිච්චි කරන්නේ එයාගේ බල්ලා ‘ඩෙනිස්’ට කතා කරන්න සලස්වන්න, එයා ආස කරන ගෑනු ළමයා ‘කැතරින්’ ගේ හිත දිනාගන්න වගේ පිස්සු වැඩ වලට. හැබැයි එයා හිතන දේ ඒ විදිහටම නෙවෙයි වෙන්නේ. එයා ප්‍රාර්ථනා කරන දේවල් වචනාර්ථයෙන්ම ඉටු වෙන්න ගිහින් හැමදේම අවුල් ජාලාවක් වෙනවා.
මේ ඔක්කොම වෙද්දී, අර පිටසක්වල කට්ටිය උඩ ඉඳන් බලාගෙන ඉන්නවා. නීල් මේ බලයෙන් හොඳ දෙයක් කරයිද, නැත්නම් එයාගේ මෝඩ වැඩ නිසා පෘථිවියම විනාශ කරලා දාන්න වෙයිද කියලා තමයි කතාව යන්නේ.

මේකේ ප්‍රධාන චරිතය ‘නීල්’ විදිහට ඉන්නේ සයිමන් පෙග් (Simon Pegg). ‘කැතරින්’ විදිහට කේට් බෙකින්සේල් (Kate Beckinsale) ඉන්නවා. විශේෂම දේ තමයි, නීල්ගේ බල්ලා ඩෙනිස්ට හඬ කවන්නේ දිවංගත රොබින් විලියම්ස් (Robin Williams). චිත්‍රපටය අධ්‍යක්ෂණය කළේ ප්‍රසිද්ධ Monty Python කණ්ඩායමේ ටෙරී ජෝන්ස් (Terry Jones).