මේක ඇඟ කිලිපොලා යන ජාතියේ කතාවක්. ‘Birth/Rebirth’ (2023) කියන්නේ අම්මා කෙනෙක්ගේ ආදරයයි, විද්‍යාවේ අඳුරු පැත්තයි ගැටෙන තැනක් ගැන.

කතාවේ ඉන්නේ කාන්තාවෝ දෙන්නෙක්. සෙලී (Celie) කියන්නේ හොස්පිටල් එකක වැඩ කරන නර්ස් කෙනෙක්. එයාගේ මුළු ජීවිතේම එයාගේ හය හැවිරිදි දුව ලීලා (Lila). අනිත් කෙනා රෝස් (Rose). රෝස් කියන්නේ ඒ හොස්පිටල් එකේම මෝචරියේ වැඩ කරන, හරිම අමුතු, තමන්ගේ පාඩුවේ ඉන්න ඩොක්ටර් කෙනෙක්. එයා රහසින්ම මැරුණු අයට ආයෙත් පණ දෙන්න පුළුවන්ද කියලා අත්හදා බැලීම් කරනවා.

දවසක්, හිතාගන්නවත් බැරි විදිහට සෙලීගේ දුව ලීලා එකපාරටම මැරෙනවා. සෙලීගේ මුළු ලෝකෙම කඩාගෙන වැටෙනවා. ඒත් ඊට පස්සේ ඊටත් වඩා අමුතු දෙයක් වෙනවා. ලීලගේ මිනිය මෝචරියෙන් අතුරුදහන් වෙනවා.

සෙලීට සැක හිතෙන්නේ රෝස්ව. එයා රෝස්ගේ ඇපාර්ට්මන්ට් එක හොයාගෙන ගිහින් බලෙන්ම ඇතුල් වෙනවා. එතන සෙලී දකින දේ එයාගේ ඔළුව අවුල් කරනවා. එයාගේ මැරුණු දුව… ආයෙත් හුස්ම ගන්නවා!

රෝස්ගේ අත්හදා බැලීම සාර්ථක වෙලා. ඒත් මේක සාමාන්‍ය ජීවිතයක් නෙවෙයි. ලීලාව මේ විදිහට “ජීවත් කරවන්න” නම්, එයාලට දිගටම විශේෂ සීරම් එකක් ඕන කරනවා. මේ සීරම් එක හදාගන්න අවශ්‍ය දේවල් හොයාගන්න එක හරිම භයානක, සදාචාර සම්පන්න නැති වැඩක්.

දැන් සෙලීට තීරණයක් ගන්න වෙනවා. තමන්ගේ දුවව ආයෙත් නැති කරගන්නවද? නැත්නම් මේ පිස්සු විද්‍යාඥයාත් එක්ක එකතු වෙලා, ආයේ කවදාවත් හැරිලා බලන්න බැරි අඳුරු පාරක යනවද?