චාර්ලි විල්සන්ගේ යුද්ධය (Charlie Wilson’s War) කියන්නේ ඇමරිකාවේ ටෙක්සාස් ප්‍රාන්තයේ හිටපු කොන්ග්‍රස් මන්ත්‍රීවරයෙක් වටා ගෙතුණු පුදුමාකාර සිදුවීම් මාලාවක්.
චාලි විල්සන් කියන්නේ පුදුම චරිතයක්. පක්ෂ, විපක්ෂ බේද නැතුව යාළුවෝ හැමෝම එක්ක සතුටින් කාලය ගත කරන, අරක්කු සිගරට් වලට බය නැති, මාර ගැම්මක් තිබ්බ කෙනෙක්.

ඒත් එක්තරා ධනවත් සමාජ ක්‍රියාකාරිනියක්, ඒ කියන්නේ ජෝඇන් හෙරිං, චාලිව හම්බවෙනවා. ඇය චාලිගේ ජීවිතේට ලොකු හැරවුමක් අරන් එනවා.

ඇය චාලිව අෆ්ගනිස්ථාන සරණාගත කඳවුරකට එක්ක යනවා. එතන සෝවියට් හමුදා අතින් අහිංසක මිනිස්සු විඳින දුක චාලිගේ හිත කම්පා කරනවා.
චාලි එතනින් එන්නේ ලොකු අභිප්‍රායක් හිතේ තියාගෙන. සෝවියට් හමුදාවට එරෙහිව සටන් කරන අෆ්ගන් රණශූරයන්ට, එහෙමත් නැතිනම් මුජාහිදීන්ලාට රහසිගතව ආයුධ සහ මුදල් දෙන්න චාලි තීරණය කරනවා.

මේ වැඩේට චාලිට උදව්වට එන්නේ සී.අයි.ඒ. එකේ වැඩ කරන, ටිකක් සැර පරුෂ, නමුත් දක්ෂ නිලධාරියෙක් වන ගස්ට් ඇව්රකොටෝස්.
චාලි, ජෝඇන් සහ ගස්ට් කියන මේ අමුතුම ත්‍රිත්වය එකතු වෙලා තමයි ඉතිහාසයේ ලොකුම රහසිගත මෙහෙයුමක් පටන් ගන්නේ.

කොහොමද මේ තුන්දෙනා එකතු වෙලා ඇමරිකානු රජයේ සහ ලෝකයේ අවධානයට ලක් නොවී, සෝවියට් දේශය වැනි බලවතෙකුට රිදෙන්න සලස්වන්නේ? ඒ සඳහා ඔවුන්ට මුහුණ දෙන්න වෙන අභියෝග මොනවද?

සෑම යුද්ධයකින්ම පසු ඉතිරිවන අඳුරු පැත්තක් තියෙනවා. මේ අතිවිශාල ආධාර වැඩසටහනේ අවසාන ප්‍රතිඵලය මොකක් වෙයිද? මේ කතාවේ ඊට වඩා ලොකු වටපිටාවක් තියෙනවා, ඒක තමයි වැදගත්.

චාලිගේ මේ සටන දේශපාලන කුතුහලය, හාස්‍යය සහ සත්‍ය සිදුවීම් ගොඩක් එක්ක බලන්න අමතක නොවන අත්දැකීමක්!