ඔයාලා Crime, Action සහ Real-life stories වලට කැමති නම්, Chasing the Dragon කියන්නේ අනිවාර්යයෙන්ම බලන්න ඕන ෆිල්ම් එකක්. මේකේ ප්‍රධාන චරිත කරන්නේ අපි කවුරුත් දන්න ඩොනී යෙන් (Donnie Yen) සහ ඇන්ඩි ලාවු (Andy Lau). මේ කතාව ගෙතෙන්නේ 1960 දශකයේ බ්‍රිතාන්‍ය පාලනය යටතේ තිබුණු හොංකොං නගරය වටායි. ඒ කාලේ හොංකොං කියන්නේ දූෂණයෙන් පිරුණු, නීතියට වඩා සල්ලි සහ බලය රජ කරපු තැනක්.

කතාව පටන් ගන්නේ චීනයෙන් හොංකොං වලට හොරෙන් පැනලා එන “හෝ” කියන තරුණයාගෙන්. කිසිම හව්හරණක් නැතිව එන මේ මනුස්සයා ජීවත් වෙන්න ඕන නිසා පොඩි පොඩි රණ්ඩු වලට පැටලෙනවා. හැබැයි එයා සටන් කරන්න පුදුම දක්ෂයෙක්. ඔය අතරේ එයාට මුණගැහෙනවා “ලී රොක්” කියන දක්ෂ වගේම කපටි පොලිස් නිලධාරියාව. මේ දෙන්නා අතර ඇතිවෙන හිතවත්කම නිසා මුළු හොංකොං නගරයම හෙල්ලෙන ලොකු ගේම් එකක් පටන් ගන්නවා.

හෝ කියන්නේ පස්සේ කාලෙක හොංකොං වල කුඩු ජාවාරමේ ලොකුම පුලුවා (Crippled Ho) වෙන කෙනා. ලී රොක් කියන්නේ පොලිස් බලය පාවිච්චි කරලා නගරයේ පාලනය අතට ගන්න කෙනා. ඉතින් නීතිය පැත්තේ ඉන්න කෙනෙකුයි, පාතාලයේ රජවරුයි එකතු වුණාම මොන වගේ දෙයක් වෙයිද? මේ දෙන්නා කොහොමද මුළු නගරයම තමන්ගේ අත්ලට ගන්නේ? හැබැයි මේ බලය පස්සේ යද්දී ඔවුන්ට අහිමි වෙන දේවල් වැඩියි. චිත්‍රපටිය පුරාම තියෙන සටන් ජවනිකා සහ ඒ කාලේ හොංකොං වල තිබුණු “ලෝකල්” ගතිය ඔයාලව වෙනම ලෝකෙකට අරන් යාවි. අන්තිමට මේ දෙන්නාගේ මිත්‍රත්වයට මොකද වෙන්නේ කියලා දැනගන්න නම් මේක අනිවාර්යයෙන්ම බලන්න.