“Dark Asset” (2023) කියන්නෙ වෙනස්ම විදිහක ඇක්ෂන් ත්‍රිලර් (Action Thriller) එකක්.
මේක අධ්‍යක්ෂණය කරලා තියෙන්නෙ මයිකල් විනික් (Michael Winnick). ප්‍රධාන නළුවා බයිරන් මන් (Byron Mann), ඔහු තමයි ‘ජෝන්’ කියන චරිතෙට පණ දෙන්නෙ. ඊට අමතරව ‘ටර්මිනේටර් 2’ එකේ හිටපු රොබට් පැට්‍රික් (Robert Patrick) සහ හෙලේනා මැට්සන් (Helena Mattsson) මෙහි ප්‍රධාන චරිත නිරූපණය කරනවා.

කතාව පටන් ගන්නෙ ‘ජෝන්’ කියන කෙනා හොටෙල් බාර් එකකදී ‘ජේන්’ කියන ලස්සන කාන්තාවක් එක්ක කතාවට වැටෙන තැනින්. ජෝන්, ජේන්ට පුදුම කතාවක් කියන්න පටන් ගන්නවා.

ඔහු කියන විදිහට, ඔහු කියන්නෙ රජයේ රහසිගත, භයානක වැඩසටහනකින් පැනලා ආපු හිටපු සොල්දාදුවෙක්. මේ වැඩසටහන ‘වෛද්‍ය කේන්’ (රොබට් පැට්‍රික්) කියන කෙනෙක් තමයි මෙහෙයවලා තියෙන්නෙ. ඔවුන් කරලා තියෙන්නෙ සොල්දාදුවන්ගෙ මොළයට මයික්‍රොචිප් එකක් ඇතුළත් කරලා, ඔවුන්ව සාමාන්‍ය මිනිස්සුන්ට වඩා දක්ෂ, මාරාන්තික “සුපිරි සොල්දාදුවන්” (Super Soldiers) බවට පත් කරන එක.

ජෝන් මේ භයානක තැනින් පැනලා ආපු හැටිත්, මේ චිප් එක නිසා එයාට ලැබුණු බලය ගැනත්, වෛද්‍ය කේන් එයාව මරන්න හොයන හැටිත් ජෝන් විස්තර කරනවා.

මුළු ෆිල්ම් එකම ගලාගෙන යන්නෙ මේ බාර් එකේ සිද්ධවෙන සංවාදයත් එක්ක. කුතුහලය තියෙන තැන තමයි මේක: ජෝන් කියන මේ ඇදහගන්න බැරි කතාව ඇත්තක්ද? නැත්නම් එයාට පිස්සුද? එහෙමත් නැත්නම් මේ හැමදේම අහගෙන ඉන්න ‘ජේන්’ කියන්නෙ කවුද? ජෝන් ඇත්තටම එයා හිතන කෙනාද?

මේක නිකම්ම වෙඩි තියාගන්න ඇක්ෂන් ෆිල්ම් එකකට වඩා, කතාව ඇතුළෙ තවත් කතාවක් හංගපු, බලන කෙනාව කුතුහලයෙන් තියන වර්ගයේ චිත්‍රපටයක්.