අධ්‍යක්ෂණය: Tom Guard, Charles Guard (The Guard Brothers) ප්‍රධාන නළු නිළියන්: Colin Morgan, Aml Ameen, Felicity Jones, Mark Strong

මේක 1970 ගණන් වල ලන්ඩන් නගරය වටා ගෙතුණු සුපිරිම Revenge Thriller එකක්. කතාවේ ප්‍රධාන චරිතය මයිකල්. එයා කලින් අයර්ලන්තේ පැරාමිලිටරි එකේ වැඩ කරපු දක්ෂ සටන්කරුවෙක්. දැන් එයා ඒ දේවල් අතඇරලා තමන්ගේ ගැබිනි බිරිඳ එක්ක පාඩුවේ ජීවත් වෙන්න හදන කෙනෙක්. ඒත් දෛවය එයාට ඒකට ඉඩ දෙන්නේ නෑ. දවසක් බ්‍රිතාන්‍ය හමුදාව කරන වෙඩි තැබීමකදී, මයිකල්ගේ ඇස් ඉස්සරහම එයාගේ ආදරණීය බිරිඳ මිය යනවා. මේ වෙඩි තැබීම කරන්නේ ටෙම්පස්ට් (Tempest) කියලා හමුදා නිලධාරියෙක්.

තමන්ගේ බිරිඳගේ මරණයෙන් පස්සේ මයිකල්ගේ හිතේ තියෙන්නේ එකම එක අරමුණයි. ඒ තමයි පළිගැනීම. එයා තමන් මැරුණා කියලා ලෝකෙට අඟවලා, රහසිගතව ලන්ඩන් වලට එනවා අර නිලධාරියාව හොයාගෙන. හැබැයි මේක ලේසි වැඩක් නෙවෙයි. මොකද ලන්ඩන් වල ආරක්ෂාවත් එක්ක මේ වගේ මෙහෙයුමක් කරන එක ලේසි නෑ. අනෙක් පැත්තෙන් අර නිලධාරියාත් නිකම් ඉන්නේ නෑ. මේ දෙන්නා අතර ලන්ඩන් වීදි පුරා යන දඩයම තමයි ෆිල්ම් එකේ තියෙන්නේ. පූසයි මීයයි වගේ හැංගි මුත්තන් කරන මේ සටන හරිම ත්‍රාසජනකයි.

මේ ෆිල්ම් එකේ තියෙන පරණ ලන්ඩන් පසුබිම, අඳුරු වීදි සහ ඒ කාලේ තිබුණු දේශපාලන වාතාවරණය හරිම තාත්විකව පෙන්නනවා. නිකම්ම වෙඩි තියාගන්න ෆිල්ම් එකක් නෙවෙයි, මේකේ ලොකු කතාවක් තියෙනවා. තමන්ගේ බිරිඳ මරපු කෙනා ඉස්සරහට ආවම මයිකල් මොනවා කරයිද? එයාට මේ පලිගැනීම ඉවර කරන්න පුළුවන් වෙයිද? නැත්නම් එයා පොලිසියට කොටු වෙයිද? අන්තිම තත්පරේ වෙනකම්ම කුතුහලය රඳා පවතින සුපිරි චිත්‍රපටයක්. “Taken” හෝ “John Wick” වගේ පළිගැනීමේ කතා (Revenge stories) වලට කැමති අයට මේක අනිවාර්යයෙන්ම බලන්න වටින ෆිල්ම් එකක්.