“Don’t Say a Word” (2001) කියන්නේ බලන් ඉන්නකොට ඇඟ හිරිවැටෙන ජාතියේ සුපිරි ත්‍රිලර් එකක්. මේක අධ්‍යක්ෂණය කරලා තියෙන්නේ ගැරී ෆ්ලෙඩර් (Gary Fleder). ප්‍රධාන චරිතවලට පණ පොවන්නේ මයිකල් ඩග්ලස් (Michael Douglas), ෂෝන් බීන් (Sean Bean) සහ බ්‍රිටනි මර්ෆි (Brittany Murphy).

කතාව පටන් ගන්නේ මෙහෙමයි: ඩොක්ටර් නේදන් කොන්රඩ් (මයිකල් ඩග්ලස්) කියන්නේ හරිම දක්ෂ, ප්‍රසිද්ධ මනෝ වෛද්‍යවරයෙක්. හැමදේම හොඳින් යද්දී, එකපාරටම මෙයාගේ පොඩි දුවව කට්ටියක් පැහැරගන්නවා. හැබැයි පුදුම දේ කියන්නේ, මේ පැහැරගත්ත අයට (ෂෝන් බීන් තමයි ලොක්කා) කප්පම් සල්ලි ඕන වෙන්නේ නෑ.

උන්ට ඕන එකම දේ තමයි, ඩොක්ටර් නේදන් යටතේ ප්‍රතිකාර ලබන විශේෂ මානසික රෝගී තරුණියක් (බ්‍රිටනි මර්ෆි) ඉන්නවා. එයා කතා කරන්නේ නෑ, ඉන්නේ එයාගෙම ලෝකයක. අන්න ඒ කෙල්ලගේ ඔළුවේ තියෙන “අංක හයක කෝඩ් එකක්” දැනගන්න විතරයි.

හොරු ඩොක්ටර් නේදන්ට ඩෙඩ්ලයින් එකක් දෙනවා. හරියටම හවස 5 වෙද්දී අර කෙල්ලගෙන් අංකේ අරන් දුන්නේ නැත්නම්, දුවව මරලා දානවා.

දැන් ඩොක්ටර් නේදන්ට තියෙන්නේ ජීවිතේ ලොකුම අභියෝගය. තමන්ගේ දුවව බේරගන්න, මේ මානසිකව සම්පූර්ණයෙන්ම වැටිලා ඉන්න, කතා නොකරන කෙල්ලගේ හිත ඇතුළට ගිහින්, එයා හංගගෙන ඉන්න ඒ රහස් අංකය හොයාගන්න ඕන. ඇයි මේ අංකය මෙච්චර වටින්නේ? මේ කෙල්ල දැක්කේ මොකක්ද? නේදන්ට දුවව බේරගන්න පුළුවන් වෙයිද? ෆිල්ම් එක බලලම තමයි ඒ කුතුහලය නැති කරගන්න වෙන්නේ.