Gothika (2003) පට්ටම හොල්මන් ත්‍රිලර් එකක්.
ඉස්සෙල්ලම කියන්නම්, මේක අධ්‍යක්ෂණය කළේ Mathieu Kassovitz. ප්‍රධාන චරිතවලට ඉන්නේ Halle Berry, Robert Downey Jr. (අයන් මෑන්) සහ Penélope Cruz.
ඩොක්ටර් මිරැන්ඩා ග්‍රේ (මේ චරිතේ කරන්නේ Halle Berry) කියන්නේ මානසික රෝහලක ඉන්න හරිම දක්ෂ මනෝ වෛද්‍යවරියක්. එයා “පිස්සු” කියන දේ විශ්වාස කරන්නේ නැහැ, හැමදේටම විද්‍යාත්මක පැහැදිලි කිරීමක් හොයන කෙනෙක්.

දැන් තමයි කතාව පටන් ගන්නේ. එක දවසක් රෑක, මහා කුණාටුවක් මැදින් ඩොක්ටර් මිරැන්ඩා ගෙදර යනවා. පාර වහලා, වෙන පාරකින් යද්දී එකපාරටම පාර මැද්දට අද්භූත ගැහැණු ළමයෙක් පනිනවා. මිරැන්ඩා කාර් එක නවත්තලා බලන්න යද්දී… අමුතු දෙයක් වෙනවා.
ඊළඟට මිරැන්ඩාට ඇහැරෙන්නේ කොහෙද දන්නවද?

එයා වැඩ කරපු මානසික රෝහලෙම වීදුරු කාමරයක, හැබැයි ඩොක්ටර් කෙනෙක් විදිහට නෙවෙයි, භයානක රෝගියෙක් විදිහට!

එයාට දවස් තුනකින් වෙච්ච කිසිම දෙයක් මතක නෑ. එයාගේ සගයා, ඩොක්ටර් පීට් (Robert Downey Jr.) ඇවිත් කියනවා, මිරැන්ඩා එයාගේම මහත්තයව—ඒ කියන්නේ රෝහලේ ලොක්කව—පොරවකින් කෑලි කෑලිවලට කපලා මරලා දාලා කියලා.

මිරැන්ඩාට මේක හීනයක් වගේ. එයා කොහොමද එහෙම දෙයක් කරන්නේ? එයා අර හොල්මන ගැන කිව්වට කවුරුත් විශ්වාස කරන්නේ නෑ. හැමෝම හිතන්නේ එයාට හොඳටම පිස්සු කියලා.
දැන් එයාට තියෙන්නේ එයා පිස්සු නැහැ කියලා ඔප්පු කරන්න. ඒ වගේම, ඇත්තටම එදා රෑ මොකද වුණේ? කවුද අර ගැහැණු ළමයා? මේ රෝහල ඇතුළේ වෙන මොකක්හරි අඳුරු රහසක් තියෙනවද? කතාව යන්නේ ඒක හොයාගෙනයි.