‘Hardcore Henry’ (2015) කියන්නෙ නම් ඔයා මීට කලින් බලපු කිසිම ෆිල්ම් එකක් වගේ නෙවෙයි. මේකෙ විශේෂත්වය තමයි, මුළු චිත්‍රපටයම රූගත කරලා තියෙන්නෙ ප්‍රධාන චරිතය වන ‘හෙන්රි’ගෙ ඇස් දෙකෙන් (First-Person-View). හරියට ඔයාම වීඩියෝ ගේම් එකක් සෙල්ලම් කරනවා වගේ දැනෙන්නෙ.

කතාව පටන් ගන්නේ මෙහෙමයි: හෙන්රිට එකපාරටම සිහිය එනවා. එයා ඉන්නෙ අමුතු ලැබ් එකක. එයාට කිසිම දෙයක් මතක නෑ, කතා කරන්නත් බෑ. එතන ඉන්න විද්‍යාඥවරියක් (එස්ටෙල්) කියනවා එයා තමයි හෙන්රිගෙ බිරිඳ කියලා, අනතුරකින් පස්සෙ එයාව ‘සයිබර්ග්’ කෙනෙක් (භාගෙට මනුස්සයෙක්, භාගෙට රොබෝ කෙනෙක්) විදිහට ආයෙමත් හැදුවා කියලා.
හෙන්රිට හරිහැටි හුස්මක් ගන්නවත් හම්බවෙන්නෙ නෑ, ‘ඒකන්’ කියලා අද්භූත බලයක් තියෙන දුෂ්ඨයෙක් ලැබ් එකට කඩා පැනලා, එස්ටෙල්ව පැහැරගන්නවා.

දැන් ඉතින් හෙන්රිට සිද්ධ වෙනවා, තමන් කවුද කියලවත් දන්නෙ නැතුව, මුළු මොස්කව් නගරයම පීරලා එයාගෙ බිරිඳව බේරගන්න. මේ පිස්සු හැදෙන ගමනෙදි හෙන්රිට ‘ජිමී’ කියලා අමුතුම චරිතයක් උදව් කරනවා. ජිමී එක එක වෙස් වලින් ඇවිත් හෙන්රිට උදව් කරලා, මැරිලා වැටෙනවා… ඒත් ආයෙත් වෙන තැනකින් මතු වෙනවා!

ඇත්තටම මේ ජිමී කියන්නෙ කවුද? එස්ටෙල් කිව්ව කතාව ඇත්තක්ද?

මේක අධ්‍යක්ෂණය කළේ ඉල්යා නයිශුලර් (Ilya Naishuller). අර අමුතු ජිමීගෙ චරිත ගොඩක් කරන්නේ දක්ෂ නළු ෂාර්ල්ටෝ කෝප්ලි (Sharlto Copley). එස්ටෙල් විදිහට හේලි බෙනට් (Haley Bennett) රඟපානවා. ඔයා නොනවතින ඇක්ෂන් වලට කැමති නම් මේක අලුත්ම අත්දැකීමක් වේවි.