ඔන්න එහෙනම් අද ගෙනාවේ 2001 අවුරුද්දේ රිලීස් වුනු “In the Bedroom” කියන සුපිරිම ෆිල්ම් එකේ විස්තරේ. මේක අධ්‍යක්ෂණය කරලා තියෙන්නේ Todd Field. ඒ වගේම Sissy Spacek, Tom Wilkinson සහ Marisa Tomei වගේ ඉතාම දක්ෂ නළු නිළියන් පිරිසක් තමයි මේකේ ප්‍රධාන චරිතවලට පණ පොවන්නේ.

මේකේ ප්‍රධාන චරිත දෙක තමයි මැට් සහ රූත් කියන යුවළ. මැට් කියන්නේ ඩොක්ටර් කෙනෙක්, රූත් කියන්නේ මියුසික් ටීචර් කෙනෙක්. මේ දෙන්නා ඇමරිකාවේ හරිම ලස්සන, නිස්කලංක පළාතක තමන්ගේ පාඩුවේ ජීවත් වෙනවා. මේ අයගේ එකම පුතා ෆ්‍රෑන්ක්. ප්‍රශ්නේ පටන් ගන්නේ ෆ්‍රෑන්ක් එයාට වඩා වයසින් වැඩි, දරුවොත් ඉන්න “නටාලි” කියන කාන්තාවක් එක්ක සම්බන්ධයක් පටන් ගත්තට පස්සේ.

නටාලිට කලින් හස්බන්ඩ් කෙනෙක් ඉන්නවා. එයා හරිම දරුණු, ඒ වගේම කලහකාරී මනුස්සයෙක්. ඉතින් මේ සම්බන්ධෙට එයාගෙන් ලොකු බාධාවක් එනවා. ඔහොම ඉන්නකොට එක පාරටම හිතාගන්න බැරි විදිහේ ලොකු ඛේදවාචකයක් සිද්ධ වෙලා මේ පවුලේ සතුට සම්පූර්ණයෙන්ම නැති වෙලා යනවා.

මේ සිද්ධියත් එක්ක මැට් සහ රූත් ලොකු කම්පනයකට පත් වෙනවා විතරක් නෙවෙයි, නීතියෙන් එයාලට සාධාරණයක් ඉටු නොවෙන තැනට වැඩ සිද්ධ වෙනවා. ඉතින් තමන්ට අහිමි වුන දේ වෙනුවෙන්, නීතියෙන් කරන්න බැරි වුන දේ තමන්ගේ අතට ගන්න මේ සාමකාමී යුවළ තීරණය කරනවා. ශෝකය සහ පළිගැනීමේ චේතනාව මිනිස්සුන්ව කොච්චර දුරකට අරන් යන්න පුළුවන්ද? මේ දෙන්නා අන්තිමට මොන වගේ භයානක තීරණයක් ගනීවිද? ඒ ටික දැනගන්න නම් කුතුහලයෙන් පිරි මේ ෆිල්ම් එක බලන්නම වෙනවා.