මේක 2019 වර්ෂයේ නිකුත් වුණු විද්‍යා ප්‍රබන්ධ (Sci-Fi) චිත්‍රපටයක්. මේකේ අධ්‍යක්ෂකවරයා වෙන්නේ Jonathan Helpert. ප්‍රධාන චරිත විදිහට Margaret Qualley (සෑම් ලෙස), Anthony Mackie (මයිකා ලෙස) සහ Danny Huston (හැරී ලෙස) රංගනයෙන් දායක වෙනවා.

කතා සාරාංශය: හිතන්නකෝ, අපේ පෘථිවිය සම්පූර්ණයෙන්ම විනාශ වෙලා කියලා. වායුගෝලය විස වෙලා හුස්ම ගන්න බැරි තත්ත්වයකට පත් වුණාම, මනුෂ්‍ය වර්ගයා පෘථිවිය අතහැරලා දානවා. ඒ අය යන්නේ බ්‍රහස්පති ග්‍රහයාගේ උපග්‍රහයෙක් වන “IO” (අයෝ) ආසන්නයේ පිහිටි අභ්‍යවකාශ මධ්‍යස්ථානයකට.

හැබැයි මේ ඔක්කොම දාලා යද්දි, “සෑම්” කියන තරුණ විද්‍යාඥවරිය විතරක් පෘථිවියේ ඉතුරු වෙනවා. එයා විශ්වාස කරනවා තාමත් පෘථිවිය බේරගන්න පුළුවන් කියලා. එයා උස් කඳු මුදුනක තියෙන ලැබ් එකක තනියම ඉඳගෙන, ඔක්සිජන් හදන්න පුළුවන් බැක්ටීරියා වර්ගයක් හොයාගන්න පරීක්ෂණ කරනවා. එයාගේ එකම සම්බන්ධතාවය වෙන්නේ රේඩියෝ එක හරහා එන පණිවිඩ විතරයි.

ඔහොම ඉද්දි තමයි දවසක් හදිසියේම බලුන් එකකින් තව මනුස්සයෙක් (මයිකා) එයා ඉන්න තැනට කඩාගෙන පාත් වෙන්නේ. මයිකාගේ පැමිණීමත් එක්ක සෑම්ගේ හුදකලා ලෝකය දෙදරා යනවා. මයිකා කියනවා පෘථිවිය දාලා යන්න තියෙන අන්තිම ෂට්ල් එක (Shuttle) ළඟදීම පිටත් වෙනවා, ඒක මිස් වුණොත් ආයේ කවදාවත් මෙහෙන් යන්න වෙන්නේ නෑ කියලා.

දැන් සෑම්ට ජීවිතේ ලොකුම තීරණය ගන්න වෙනවා. එයා ආදරේ කරන, හැබැයි මැරෙමින් තියෙන පෘථිවියේ දිගටම නවතිනවද? නැත්නම් මයිකා එක්ක එකතු වෙලා අර අන්තිම ෂට්ල් එකේ IO (අයෝ) බලා යන්න පිටත් වෙනවද? ඇත්තටම පෘථිවියට බලාපොරොත්තුවක් තියෙනවද නැත්නම් ඒක සෑම්ගේ හිතළුවක් විතරද? මේ ප්‍රශ්න ටිකට උත්තර දැනගන්න නම් ෆිල්ම් එක බලන්නම වෙනවා.