මේක පට්ටම වෙනස් විදියේ ක්‍රොස්ඕවර් (crossover) ඇනිමේෂන් ෆිල්ම් එකක්. හිතන්නකෝ DC එකේ සුපිරිම වීරයෝ සෙට් එකයි, RWBY එකේ කෙල්ලෝ ටිකයි එකට මුණගැහුණොත් කොහොම තියෙයිද?
කතාව පටන් ගන්නේ මෙහෙමයි: සුපර්මෑන්, බැට්මෑන්, වොන්ඩර් වුමන්, ෆ්ලෑෂ් ඇතුළු ජස්ටිස් ලීග් එකේ කට්ටිය එකපාරටම අමුතු ලෝකෙකට ඇදිලා එනවා. ඒ තමයි RWBY කතාවේ ‘රෙම්නන්ට්’ (Remnant) කියන ලෝකේ. හැබැයි ලොකුම අවුල ඒක නෙවෙයි. මේ වීරයෝ ඔක්කොම ආපහු ටීනේජ් වයසට වැටිලා, හරියට ඉස්කෝලේ යන ළමයි වගේ! එයාලගේ සුපිරි බලවල් එහෙමත් හරියට වැඩ කරන්නේ නෑ, එයාලටත් හිතාගන්න බෑ මොකද වුණේ කියලා.

ඉතින් මේ අලුත් ලෝකේ අතරමං වෙලා ඉන්නකොට තමයි එයාලට ටීම් RWBY එකේ රූබි, වයිස්, බ්ලේක් සහ යැන්ග්ව හම්බවෙන්නේ. මුලදී මේ කවුද කියලා පොඩි තේරුම් නොගැනීමක් තිබුණත්, එයාලට ඉක්මනටම තේරෙනවා මේ ලෝක දෙකේම පරණ හතුරෝ එකතු වෙලා ලොකු විනාශයකට ලෑස්ති වෙනවා කියලා. දැන් මේ ලෝක දෙකේම වීරයන්ට එකතු වෙලා, එයාලා කොහොමද මෙහෙට ආවේ කියලත් හොයාගන්න ගමන්, මේ අලුත් සතුරා පරද්දන්න වෙනවා.

මේක කෙරී ෂෝක්‍රොස් (Kerry Shawcross) තමයි අධ්‍යක්ෂණය කරලා තියෙන්නේ (එයා තමයි RWBY සීරීස් එකත් ගොඩක් කලේ). ජස්ටිස් ලීග් එකේ හඬ දෙන අය අතර චැන්ඩ්ලර් රිග්ස් (සුපර්මෑන්) සහ නැට් වුල්ෆ් (බැට්මෑන්) ඉන්නවා. RWBY ටීම් එකට නම් සුපුරුදු හඬ ශිල්පීන්ම තමයි ඉන්නේ.