මේක ඇත්ත සිදුවීමක් පදනම් කරගෙන හදපු, කුතුහලය පිරි Action Thriller චිත්‍රපටයක්. මේකේ ප්‍රධාන නළුවා විදියට අපි කවුරුත් දන්න, දක්ෂ සටන් නළුවෙක් වන විද්‍යුත් ජම්වාල් (Vidyut Jammwal – සමීර් ලෙස) රඟපානවා. ප්‍රධාන නිළිය විදියට ශිවාලිකා ඔබරෝයි (Shivaleeka Oberoi – නර්ගිස් ලෙස) දායක වෙනවා. මේ චිත්‍රපටය අධ්‍යක්ෂණය කරලා තියෙන්නේ ෆාරුක් කබීර් (Faruk Kabir).

කතාව පටන් ගන්නේ 2008 අවුරුද්දේ ලෝකෙම ලොකු ආර්ථික අර්බුදයක් තිබුණු කාලෙක. සමීර් සහ නර්ගිස් කියන්නේ හරිම ආදරෙන් ඉන්න අලුත බැඳපු ජෝඩුවක්. මේ ආර්ථික ප්‍රශ්නෙ නිසා මේ දෙන්නටම රස්සා නැති වෙනවා. ඉතින් වෙන කරන්නම දෙයක් නැති තැන, දෙන්නා තීරණය කරනවා “නෝමන්” කියන මැදපෙරදිග රටට ගිහින් රස්සාවක් කරන්න.

ඒ අනුව නර්ගිස් මුලින්ම ඒ රටට යනවා. හැබැයි එයා ගුවන් තොටුපළෙන් එළියට ආවට පස්සේ වෙන්නේ හිතාගන්නවත් බැරි දෙයක්. නර්ගිස් බය වෙලා, හොඳටම අඬ අඬා සමීර්ට කෝල් එකක් අරන් කියනවා “මාව බේරගන්න, මෙතන මොකක් හරි වැරැද්දක් වෙනවා, මට ඔයාව ඕනේ” කියලා. ඊට පස්සේ ෆෝන් එක කට් වෙනවා.

තමන්ගේ ආදරණීය බිරිඳට මොකද වුණේ කියලා හොයන්න සමීර් ඒ රටට යනවා. හැබැයි ඒ රටේ භාෂාව එයා දන්නේ නෑ, අඳුරන කවුරුත් නෑ. එයාට මුහුණ දෙන්න වෙන්නේ ඉතාම භයානක මිනිස් ජාවාරම්කාරයෝ කල්ලියකට. පොලිසියෙන්වත් එයාට ලොකු සහයෝගයක් ලැබෙන්නේ නෑ.

ඉතින් මේ තනි මනුස්සයා කොහොමද ලොකු මාෆියා කල්ලියක් එක්ක හැප්පිලා තමන්ගේ බිරිඳව හොයාගන්නේ? එයාට නර්ගිස්ව පණපිටින් බේරගන්න පුළුවන් වෙයිද? නැත්නම් එයා පරක්කු වැඩි වෙයිද? අන්න ඒ ටික දැනගන්න නම් හුස්ම හිර කරගෙන මේ ෆිල්ම් එක බලන්නම වෙනවා.