මේක පළවෙනි ෆිල්ම් එක වගේම පට්ට action thriller එකක්. මේක අධ්‍යක්ෂණය කරලා තියෙන්නේ Jérôme Salle. ප්‍රධාන චරිතෙ, ඒ කියන්නේ ලාර්ගෝ වින්ච්, කරන්නේ Tomer Sisley. හැබැයි මේ පාර සුපිරි නිළි Sharon Stone පවා ඉන්නවා ලොකු චරිතයකින්.

කතාව පටන් ගන්නේ මෙහෙමයි. ලාර්ගෝ දැන් එයාගේ තාත්තගේ මරණෙන් පස්සේ බිලියන ගාණක ‘W Group’ කම්පැනියේ අලුත් ලොක්කා වෙලානේ. හැබැයි පොර එකපාරටම අමුතු තීරණයක් ගන්නවා. මේ මුළු කම්පැනියම විකුණලා දාලා, ඒ එන සල්ලි ඔක්කොම ලොකු පුණ්‍යායතනයකට ලියලා දෙන්න එයා හදන්නේ.

හිතන්නකෝ ෂෝක් එක! ඒත්, එයා ඒ ගිවිසුම අත්සන් තියන්න හදන දවසෙම, කතාව සම්පූර්ණයෙන්ම අනිත් පැත්ත ගැහෙනවා.

ෂැරන් ස්ටෝන් (ඩයන් ෆ්‍රැන්කන්) කියලා ජාත්‍යන්තර පැමිණිලිකාරියක්, ලාර්ගෝව අත්අඩංගුවට ගන්න එනවා. චෝදනාව මොකක්ද දන්නවද? මනුෂ්‍යත්වයට එරෙහි අපරාධ!
එයාලා කියනවා, ලාර්ගෝ බුරුමයේ (Myanmar) ගමක් සමූලඝාතනය කරන්න එහේ හමුදා ජෙනරාල් කෙනෙක්ට හොරෙන් සල්ලි දීලා තියෙනවා කියලා. අවුල කියන්නේ, ලාර්ගෝ මීට අවුරුදු ගාණකට කලින් ඇත්තටම බුරුමයේ ජීවත් වෙලා තියෙනවා.

දැන් ලාර්ගෝට තමන්ගේ නම බේරගන්න, මේ කුමන්ත්‍රණය පිටිපස්සේ ඉන්නේ කවුද, ඇත්තටම එයාගේ තාත්තා මේ අපරාධයට සම්බන්ධද කියලා හොයාගන්න, ආයෙත් බුරුමයේ භයානක අතීතයට යන්න සිද්ධ වෙනවා. එතනින් එහාට ඉතින් හිතාගන්නවත් බැරි සටන් සහ හඹා යාම් තමයි තියෙන්නේ.