ඔන්න අද අරගෙන ආවේ Adam Sandler ගේ පිස්සු හැදෙන පරණ කොමඩියක් ගැන විස්තරයක්. ඔයාට හිනා වෙවී බලන්න පුළුවන් සැහැල්ලු ෆිල්ම් එකක් හොයනවා නම්, Little Nicky කියන්නේ නියම තේරීමක්.

කාස්ට් එක සහ අධ්‍යක්ෂණය (Cast & Director) මේ චිත්‍රපටය අධ්‍යක්ෂණය කළේ Steven Brill. ප්‍රධාන චරිතය වන ‘නිකී’ විදියට රඟපාන්නේ කොමඩි රජා, Adam Sandler. ඒ වගේම අපායේ ලොක්කා හෙවත් සාතන් විදියට Harvey Keitel රඟපානවා. විශේෂම දේ තමයි Quentin Tarantino වගේ දැවැන්තයෝ පොඩි පොඩි කෑලි වලින් මේකට එකතු වීම.

කතාව මොකක්ද? අපාය කිව්වම ඔයාලට හිතෙන්නේ ගිනි ගොඩක් මැද දඬුවම් විඳින භයානක තැනක් කියලනේ? ඒත් මේ කතාවේ හැටියට අපාය කියන්නේ පවුල් ප්‍රශ්න තියෙන සාමාන්‍ය තැනක් වගේ.

සාතන්ට පුත්තු තුන් දෙනෙක් ඉන්නවා. මේකෙන් ලොකු දෙන්නා හරිම බලලෝභී වගේම නපුරුයි. හැබැයි බාලයා, ඒ කියන්නේ අපේ “නිකී” (Nicky) හරිම අහිංසක, ටිකක් විතර මන්දබුද්ධික පෙනුමක් තියෙන අමුතුම චරිතයක්. දවසක් සාතන් තීරණය කරනවා එයා විශ්‍රාම යන්නේ නෑ, දිගටම රජකම කරනවා කියලා. මේකෙන් කේන්ති ගන්න ලොකු අයියලා දෙන්නා අපායෙන් පැනලා පෘථිවියට (New York වලට) යනවා තමන්ගේම අලුත් අපායක් හදාගන්න.

මෙන්න මෙතන තමයි වැඩේ පත්තු වෙන්නේ! අයියලා දෙන්නා යනකොට අපායේ දොරටු ගල් වෙනවා. ඒ නිසා තාත්තා (සාතන්) ටිකෙන් ටික දියවෙලා මැරෙන්න පටන් ගන්නවා. දැන් ඉතින් තාත්තව බේරගන්න තියෙන එකම විකල්පය නිකී විතරයි!

හැබැයි ප්‍රශ්නේ කියන්නේ නිකීට නපුරුකම් පුරුදු නෑ වගේම මෙයාට පෘථිවිය ගැන මෙලෝ දැනුමක් නෑ. ඉතින් තාත්තව බේරගන්න පෘථිවියට එන නිකීට කතා කරන බල්ලෙක් (Mr. Beefy) සෙට් වෙනවා. මේ අහිංසක නිකී කොහොමද බලගතු අයියලා දෙන්නෙක් එක්ක හැප්පෙන්නේ? නිකීට පුළුවන් වෙයිද තාත්තවයි ලෝකෙයි දෙකම බේරගන්න?