ඔයා හොල්මන් ගෙවල් (Haunted Houses) බලන්න යන්න ආස කෙනෙක්ද? එහෙනම් මේක ඔයාගේ ඇඟ කිලිපොලා යන horror ඩොකියුමන්ටරි ෆිල්ම් එකක් වෙයි. හැබැයි මේක නිකන්ම නිකන් හොල්මන් කතාවක් නෙවෙයි, ඇමරිකාවේ තියෙන අතිශය දරුණු සහ මතභේදාත්මක “McKamey Manor” කියන හොල්මන් නිවස සහ ඒකේ නිර්මාණකරු වෙන රස් මැකේමි (Russ McKamey) ගැන කෙරෙන සැබෑ අනාවරණයක්. මේක ඇතුළට යන මිනිස්සුන්ට විඳින්න වෙන අත්දැකීම සාමාන්‍ය බයවීමකට වඩා එහා ගිය, වධහිංසාවක් වැනි දෙයක්.

මේ ස්ථානයට යන අයට සිද්ධ වෙනවා කිසිම නීතිමය පියවරක් ගන්නේ නැහැ කියලා ලොකු ගිවිසුමකට අත්සන් කරන්න. ඊටපස්සේ ඇතුළුවෙන අයට මුහුණ දෙන්න වෙන්නේ තමන්ගේ ජීවිතයේ දරුණුම බියකරු සිහිනයට. මිනිස්සුන්ව බැඳලා තැබීම, වතුරේ ගිල්වීම, ශාරීරික සහ මානසික වධහිංසා පැමිණවීම මේක ඇතුළේ සාමාන්‍ය දෙයක්. රස් මැකේමි කියන්නේ මේක නිකන්ම ක්‍රීඩාවක් කියලා කිව්වත්, මේකට සහභාගී වුණු අය පස්සේ කාලෙක හෙළිදරව් කරනවා ඒක ඇතුළේ සිද්ධ වුණේ මොන වගේ අමානුෂික දේවල්ද කියලා.

මේ ෆිල්ම් එකෙන් පෙන්වන්නේ මිනිස් මනෝවිද්‍යාව කොයිතරම් දුරකට විකෘති කරන්න පුළුවන්ද සහ මිනිස්සු තමන්ගේ කැමැත්තෙන්ම මෙච්චර දරුණු වධහිංසාවලට ලක්වෙන්න යන්නේ ඇයි කියන එකයි. ඒ වගේම මේක පිටුපස තියෙන අඳුරු රහස් මොනවාද? ඇත්තටම මේක විනෝදාස්වාදයක්ද, නැත්නම් මනෝ ව්‍යාධිකයෙකුගේ සෙල්ලම් පිටියක්ද? බය හිතෙන, ඒ වගේම සිතන්න යමක් ඉතිරි කරන සැබෑ සිදුවීම් අලලා හැදූ මේ නිර්මාණය ඔයාව සලිත කරවනවා නොඅනුමානයි.