2019 අවුරුද්දේ ලෝකයම හොල්ලපු “Ne Zha” ඇනිමේෂන් චිත්‍රපටයේ දෙවැනි කොටස තමයි මේ. පළමු චිත්‍රපටයෙන් අපි දැක්කා නේ ෂා තමන්ගේ ඉරණමට එරෙහිව සටන් කරලා තමන් කවුද කියලා ලෝකෙට පෙන්නපු හැටි. හැබැයි දෙවැනි කොටසින් කතාව තවත් සංකීර්ණ සහ දැවැන්ත වෙනවා. දෙවිවරු සහ අසුරයෝ අතර තියෙන සටන දැන් අලුත් මානයකට ඇවිත්.

නේ ෂා සහ අඕ බිංග් (Ao Bing) දැන් මුහුණ දෙන්නේ මුළු ලෝකයේම පැවැත්ම තීරණය කරන මහා ව්‍යසනයකට. මෙවර ඔවුන්ට තමන්ගේ බලය විතරක් නෙවෙයි, තමන්ගේ මිත්‍රත්වයත් පරදුවට තියන්න සිද්ධ වෙනවා. චීන ජනප්‍රවාද ඇසුරින් නිර්මාණය වුණු මේ කතාවේ තියෙන ඇනිමේෂන් සහ දෘශ්‍ය ප්‍රයෝග (Visual Effects) ඇස් අදහාගන්න බැරි තරම් ලස්සනයි. පවුල, කැපකිරීම සහ වීරත්වය කියන කාරණා ගැන හරිම සංවේදීව මේ කතාවේ කියවෙනවා. පුංචි දරුවන්ට විතරක් නෙවෙයි, වැඩිහිටි අපිටත් ලොකු ආදර්ශයක් දෙන ගමන්ම හිතාගන්න බැරි විදිහේ සටන් ජවනිකා රැසක් මේ චිත්‍රපටයේ අඩංගුයි. නේ ෂා ඇත්තටම දෙවියෙක් වෙයිද? නැත්නම් විනාශකාරී බලවේගයක් වෙයිද? ඒක දැනගන්න මේ අලුත් සිනමා සිත්තම බලන්නම වෙනවා.