‘One Piece: Stampede’ (2019) කියන්නේ වන් පීස් ෆෑන්ස්ලාට නිකන් මංගල්‍යයක් වගේ ෆිල්ම් එකක්. මේක අධ්‍යක්ෂණය කළේ තකාෂි ඔට්සුකා (Takashi Otsuka). ඉතින් හඬ නළුවන් විදියට ලූෆිට (මයුමි තනාකා), සෝරෝට (කසුයා නකායි) වගේ අපේ සුපුරුදු සෙට් එකම තමයි ඉන්නේ.

කතාව බලපු නැති කෙනෙක්ට කිව්වොත් මෙහෙමයි…
හිතන්නකෝ ලෝකේ ඉන්න දරුණුම මුහුදු කොල්ලකරුවෝ හැමෝම එකම තැනකට එකතු වෙනවා කියලා. අන්න ඒ වගේ මහා ඉවෙන්ට් එකක්, “මුහුදු කොල්ලකරුවන්ගේ ප්‍රදර්ශනයක්” (Pirates Expo) තියෙනවා. මේක සංවිධානය කරන්නේ බුඑනා ෆෙස්ටා කියන හාදයා.

මේ හැමෝම එන්නේ එකම අරමුණකට: මහා මුහුදු කොල්ලකරුවන්ගේ රජා, ගෝල් ඩී. රොජර්, හංගපු කියන සුපිරිම නිධානයක් හොයාගන්න. ඉතින් අපේ ලූෆියි, ස්ට්‍රෝ හැට් කල්ලියයි මේ නිධන් දඩයමට සෙට් වෙනවා.

ඒත්… ප්ලෑන් කරපු විදියට දේවල් වෙන්නේ නෑ. මේ මුළු උත්සවයම මාරාන්තික උගුලක් කියලා තේරුම් යද්දී පරක්කු වැඩියි.

ගෝල් ඩී. රොජර්ගේ නැවේ හිටපු, “යක්ෂයාගේ අනුප්‍රාප්තිකයා” කියන, මහා බලගතු ඩග්ලස් බුලට් (Douglas Bullet) එතනට කඩා වදිනවා. එයාගේ අරමුණ මුහුදු කොල්ලකරුවෝ, මැරීන්ස්ලා, වෝර්ලෝර්ඩ්ස්ලා… මේ හැමෝම එකපාර විනාශ කරලා දාන එක.

දැන් මේක මහා යුද්ධයක්. ලූෆිට මේ යක්ෂයාව නවත්තන්න පුළුවන් වෙයිද? නැත්නම් හැමෝගෙම අවසානය මෙතන සිද්ධ වෙයිද?