ග්‍රේම් සහ ක්ලයිව් කියන්නේ එංගලන්තේ ඉඳන් ඇමරිකාවට එන, කොමික් පොත් වලට පිස්සු වැටුණු හොඳම යාළුවෝ දෙන්නෙක්. මෙයාලගේ ලොකුම හීනයක් තමයි ඇමරිකාවේ තියෙන ‘Area 51’ වගේ පිටසක්වල ජීවීන් ගැන කතාබහ වෙන තැන් බලන්න යන එක.

ඉතින්, මෙයාලා ලොකු RV එකක් (කැරවෑන් එකක්) අරගෙන මේ ගමන පිටත් වෙනවා. එක දවසක් රෑ කට්ට කළුවරේ පාරේ යද්දී, මෙයාලගේ වාහනේ ඉස්සරහින් යන කාර් එකක් දරුණු විදිහට හැප්පිලා අනතුරක් වෙනවා. ග්‍රේම් සහ ක්ලයිව් උදව් කරන්න එතනට දුවගෙන යනවා.
ඒත් ඒ වාහනේ සුන්බුන් අස්සෙන් එළියට එන්නේ මනුස්සයෙක් නෙවෙයි.

ඒ තමයි ‘පෝල්’. පෝල් කියන්නේ කටකාර, ටිකක් නපුරු, හැබැයි විහිළුකාර, පොඩි අළු පාට පිටසක්වලයෙක්. ඌ කියන විදිහට, ඌ අවුරුදු ගාණක් Area 51 එකේ හිරකාරයෙක් විදිහට ඉඳලා, එතනින් පැනලා ආවේ.

දැන් ආණ්ඩුවේ රහස් ඒජන්තයෝ ඌව ආයෙත් අල්ලගන්න පස්සෙන් පන්නනවා. පෝල් මේ යාළුවෝ දෙන්නගෙන් උදව් ඉල්ලනවා ඌව එයාගේ යානාව නවත්වලා තියෙන තැනට ගෙනියන්න කියලා.

මුලින් බය වුණත්, මේ යාළුවෝ දෙන්නා පෝල්ට උදව් කරන්න තීරණය කරනවා. හැබැයි මේක ලේසි ගමනක් වෙන්නේ නෑ. මුළු ආණ්ඩුවම මෙයාලා පස්සේ පන්නද්දී, නොහිතන මිනිස්සු මුණගැහෙද්දී, මේ තුන්දෙනාට පෝල්ගේ යානාව ළඟට පැනලා යන්න පුළුවන් වෙයිද?