මේක අනිවාර්යයෙන්ම බලන්න වටින, ඉතිහාස කතාවක් පාදක කරගත්තු ෆිල්ම් එකක්. මේක අධ්‍යක්ෂණය කළේ Sönke Wortmann. ප්‍රධාන චරිතය වන ජොහානාට පණ දෙන්නේ Johanna Wokalek. ඒ වගේම David Wenham සහ අපි කවුරුත් දන්න John Goodman (පාප් වහන්සේ විදිහට) මේකේ රඟපානවා.

මේක යන්නේ 9 වැනි සියවසේ විතර. ඒ කාලේ හැටියට කාන්තාවන්ට පොතක් පතක් කියවන්නවත්, ඉගෙන ගන්නවත් අවසර තිබුණේ නෑ. එයාලා හිටියේ පුරුෂ මූලික සමාජයක යටත් වෙලා. හැබැයි අපේ කතා නායිකාව, ජොහානා කියන්නේ පුදුම බුද්ධිමත් කෙල්ලෙක්. එයාට කොහොමහරි ඉගෙන ගන්න ලොකු ආසාවක් තියෙනවා.

ඉතින් එයා කරන්නේ හරිම භයානක වැඩක්. එයා පිරිමියෙක් වගේ වෙස් වලාගෙන, ‘ජෝන්’ කියලා නම වෙනස් කරගෙන ආශ්‍රමයකට ඇතුල් වෙනවා. මෙයාගේ දක්ෂකමයි, දැනුමයි නිසාම පල්ලිය ඇතුළේ එයා ඉක්මනටම ඉහළට යනවා. අන්තිමේදී කොච්චර දුර යනවද කිව්වොත්, එයා රෝමයට ගිහින් මුළු කතෝලික සභාවේම නායකයා, ඒ කියන්නේ පාප් වහන්සේ බවට පත් වෙනවා!

නිකමට හිතන්නකෝ, කාන්තාවක් පිරිමි වෙස් අරගෙන ලෝකේ ලොකුම ආගමික නායකයා විදිහට වැඩ කරනවා. කවුරුත්ම දන්නේ නෑ මෙයා ගැහැණියක් කියලා. හැබැයි එයාගේ මේ ගමන ලේසි වෙන්නේ නෑ. එයාගේ පරණ පෙම්වතා, ජෙරෝල්ඩ් ආපහු එයාගේ ජීවිතේට එනවා. දැන් එයා ඉන්නේ ගිනි කන්දක් උඩ වගේ. පාප් වහන්සේට ආදර සම්බන්ධතා තියාගන්න තහනම් නේ.

මේ ලොකු රහස එළිවුණොත් එයාට අනිවාර්යයෙන්ම මැරෙන්න වෙනවා. ආදරය නිසා එයාගේ වෙස් මුහුණ ගැලවෙයිද? නැත්නම් එයා දිගටම ලෝකෙම රවට්ටගෙන ඉඳියිද? අන්තිම වෙනකන්ම කුතුහලයෙන් බලන්න පුළුවන් ෆිල්ම් එකක්.