මේ චිත්‍රපටය අධ්‍යක්ෂණය කරලා තියෙන්නේ ජූලියන් ජැරල්ඩ් (Julian Jarrold) විසින්. විශේෂම දේ තමයි, අපි කවුරුත් ආදරය කරන ‘ස්පයිඩර් මෑන්’ නළු ඇන්ඩෲ ගාෆීල්ඩ් (Andrew Garfield) තමයි මේකේ ප්‍රධාන චරිතය වන ‘එඩී ඩන්ෆර්ඩ්’ විදියට රඟපාන්නේ. ඊට අමතරව ෂෝන් බීන් (Sean Bean) සහ රෙබෙකා හෝල් වගේ දක්ෂ නළු නිළියනුත් මේකට රංගනයෙන් දායක වෙනවා.

කතාව පටන් ගන්නේ 1974 එංගලන්තයේ යෝක්ෂයර් ප්‍රදේශයෙන්. මේ කාලේ එහේ පොඩි ගැහැණු ළමයින් අතුරුදහන් වෙන භයානක රැල්ලක් ඇතිවෙලා තියෙන්නේ. එඩී කියන්නේ අපරාධ වාර්තාකරුවෙක් විදියට අලුතින් පත්තරේකට වැඩට ආපු අභිලාෂකාමී තරුණයෙක්. එයාට ඕන වෙනවා මේ ළමා අතුරුදහන් වීම් ගැන ඇත්ත හොයලා තමන්ගේ නම හදාගන්න.

එඩී මේ ගැන හාර අවුස්සන්න ගත්තම එයාට තේරෙනවා මේක නිකම්ම මිනීමරුවෙක්ගේ වැඩක් විතරක් නෙවෙයි කියලා. එයාට හම්බවෙනවා පොලිසියයි, ප්‍රදේශයේ ලොකු සල්ලිකාරයෝයි අතර තියෙන අමුතු, අඳුරු සම්බන්ධයක්. එඩී හිතුවට වඩා ලොකු, භයානක දැලක තමයි පැටලෙන්නේ. එයාට කා ගැනවත් විශ්වාස කරන්න බැරි තත්ත්වයක් උදා වෙනවා. හැමතැනම තියෙන්නේ දූෂණය සහ වංචාව.

ඇත්තටම මේ ළමයින්ට මොකද වුණේ? පොලිසිය මේක වහන්න හදන්නේ ඇයි? මේ බලවත් මිනිස්සු එක්ක හැප්පිලා එඩීට ඇත්ත එළියට ගන්න පුළුවන් වෙයිද? නැත්නම් එයාටත් ජීවිතෙන් වන්දි ගෙවන්න වෙයිද? මේ ප්‍රශ්නවලට උත්තර දැනගන්න නම් මේ චිත්‍රපටය බලන්නම වෙනවා.